TRENDING:
अनेक घरांमधे जेवणासोबत दही आणि भात खाण्याची किंवा ताक पिण्याची परंपरा आहे. दोन्हीही दुधापासून बनवलेले नैसर्गिक प्रोबायोटिक पदार्थ आहेत. आतड्यांच्या आरोग्यासाठी फायदेशीर मानले जातात. पण, आम्लपित्त किंवा बद्धकोष्ठतेचा त्रास होत असेल तर दही किंवा ताक प्यावं की नाही असा प्रश्न उपस्थित होतो. कडक उन्हाळ्यात या दही ताकाच्या गारव्यानं तुम्हाला थोडं बरं वाटेल हे नक्की.
advertisement
दही आणि ताक दोन्हीमधे प्रोबायोटिक्स असतात. हे चांगले बॅक्टेरिया आहेत, ज्यामुळे आतड्यांचं आरोग्य सुधारतं आणि पचनसंस्था मजबूत करण्यासाठी मदत होते. पचनक्रिया चांगली असते तेव्हा पोटाशी संबंधित अनेक समस्या आपोआप कमी होतात. याव्यतिरिक्त, दही आणि ताकात कॅल्शियम, प्रथिनं आणि शरीराच्या बळकटीसाठी मदत करणारे अनेक आवश्यक पोषक घटक असतात.
आम्लपित्ताच्या तक्रारीवर ताक हा एक चांगला पर्याय मानला जातो. ताक हलकं असतं आणि यात पाण्याचं प्रमाण जास्त असतं. ताकामुळे पोट थंड होतं आणि पोटात जळजळ किंवा जडपणा कमी होतो. बरेच जण ताकात भाजलेलं जिरं, काळं मीठ किंवा पुदिना मिसळतात. यामुळे गॅस आणि आम्लपित्तपासून आणखी आराम मिळू शकतो.
दही पोटासाठी देखील फायदेशीर आहे, पण जास्त आंबट दह्यामुळे काही लोकांमधे आम्लपित्त वाढू शकतं. त्यामुळे तुम्हाला आम्लपित्तचा त्रास होत असेल तर ताजं दही कमी प्रमाणात खा किंवा ते पातळ करून ताक म्हणून पिणं चांगलं.
बद्धकोष्ठतेसाठी कोणता पर्याय चांगला आहे?
दही आणि ताक दोन्ही बद्धकोष्ठतेत मदत करू शकतात. त्यातील प्रोबायोटिक्स आतड्यांमधे चांगल्या बॅक्टेरियांचं संतुलन राखतात, ज्यामुळे पचन सुधारतं. ताक हलकं असतं आणि शरीराला हायड्रेट देखील ठेवतं. म्हणूनच, अनेकांना बद्धकोष्ठतेवर उपाय म्हणून ताक जास्त आरामदायी वाटतं.
दही आणि ताकाबाबत या बाबी नेहमी लक्षात ठेवा -
नेहमी ताजं दही खा किंवा ताजं ताक प्या.
खूप आंबट किंवा शिळं दही खाणं टाळा.
रात्री जास्त प्रमाणात दही खाल्ल्यानं काहींना पचनाच्या समस्या उद्भवू शकतात.
दोन्हीचं प्रमाण माफक असू द्या.
आम्लता आणि बद्धकोष्ठता यासारख्या समस्यांसाठी ताक हा सौम्य आणि अधिक फायदेशीर पर्याय मानला जातो. तर ताजं दही, माफक प्रमाणात सेवन केल्यानं, ते पचन आणि आतड्यांसंबंधी आरोग्यासाठी देखील फायदेशीर ठरू शकतं.