विलास डोंगरे हे परळी शहरातील शिवाजीनगर भागात आपल्या कुटुंबासह वास्तव्यास होते. दररोजच्या सवयीनुसार, गुरुवारी सकाळी ते मॉर्निंग वॉकसाठी बाहेर गेले होते. सकाळी साधारण ९ वाजताच्या सुमारास ते परत घरी आले. त्यानंतर ते आपल्या बेडरुममध्ये गेले. नेहमीप्रमाणेच ते लवकर बाहेर येतील अशी अपेक्षा कुटुंबियांना होती. मात्र, बराच वेळ होऊनही ते खोलीतून बाहेर न आल्याने कुटुंबियांना काहीतरी शंका आली.
advertisement
सकाळी ११ वाजण्याच्या सुमारास, त्यांच्या कुटुंबियांनी खोलीचा दरवाजा उघडून पाहिले असता, विलास डोंगरे यांनी पंख्याला गळफास घेतल्याचे त्यांना दिसून आले. हा प्रकार पाहताच कुटुंबियांना मोठा धक्का बसला. त्यांनी तत्काळ आरडाओरडा केला आणि आजूबाजूच्या लोकांना मदतीसाठी बोलावले. त्यांना खाली उतरवून तातडीने रुग्णालयात दाखल केले. परंतु डॉक्टरांनी त्यांना मृत घोषित केले.
या घटनेची माहिती मिळताच परळी शहर पोलिसांनी घटनास्थळी धाव घेतली. त्यांनी पंचनामा केला आणि मृतदेह शवविच्छेदनासाठी पाठवला. विलास डोंगरे यांनी नेमक्या कोणत्या कारणाने टोकाचे पाऊल उचलले, हे स्पष्ट झालेले नाही. त्यांची सुसाईड नोट देखील सापडलेली नाही. त्यामुळे पोलीस सध्या त्यांच्या कुटुंबियांचे जबाब नोंदवत आहेत. आत्महत्येमागील कारणांचा शोध घेतला जात आहे.