TRENDING:
शिरूर अनंतपाळ तालुक्यातील बेवनाळ येथे जिल्हा परिषदेची इयत्ता चौथीपर्यंत शाळा आहे. केवळ दोन शिक्षकं असलेल्या या शाळेत २४ विद्यार्थी पटसंख्या आहे. शाळेतील विद्यार्थ्यांच्या गुणात्मक वाढीसाठी येथील शिक्षक नेहमीच उपक्रम राबवितात. केंद्र शासनाच्या नवीन शैक्षणिक धोरण २०२० अंतर्गत मूलभूत साक्षरता व संख्याज्ञान उपक्रमाची प्रभावी अंमलबजावणी केंद्रप्रमुख प्रभाकर हिप्परगे यांच्या मार्गदर्शनाखाली करण्यात येत आहे.
advertisement
प्राथमिक शिक्षणातच प्रत्येक विद्यार्थ्यास वाचन, लेखन व संख्याज्ञान अवगत होणे महत्त्वाचे असल्याने त्याकडे या शाळेनं विशेष लक्ष केंद्रीत केलं आहे. परिणामी, कांबळगा केंद्रातील बेवनाळ शाळेतील प्रत्येक विद्यार्थी वाचन, लेखन आणि संख्याज्ञानामध्ये पारंगत झाला आहे. यामुळे या शाळेनं थेट शाळेच्या गेटवर एक फलक लावून लिहिता वाचता न येणारा विद्यार्थी दाखवा आणि एक लाख मिळवा, अशा आशयाचा फलक लावला आहे.
शाळेच्या प्रवेशद्वारावर बक्षीसाचा फलक
बेवनाळ शाळेतील प्रत्येक विद्यार्थ्यांस लेखन, वाचन करता यावे म्हणून तेथील शिक्षकांनी विविध उपक्रम राबविले. गणितीय आकडेमोड करण्याची कलाही शिकविली आहे. त्यामुळे अवघड गणित मुले क्षणार्धात सोडवतात.त्यामुळे शाळेने प्रवेशद्वारावर वाचन, लेखन आणि संख्याज्ञान न येणारा विद्यार्थी दाखवा आणि लाख रुपये मिळवा, असा फलक लावला आहे.
केंद्रातील आणखी दोन शाळांची जय्यत तयारी
शिरूर अनंतपाळ तालुक्यातील कांबळगा केंद्रातील बेवनाळ शाळेने हा अशा प्रकारचा जिल्ह्यात पहिला उपक्रम राबविला आहे. त्याची दखल आता तालुक्यातील सावरगाव आणि बिबराळ जिल्हा परिषद शाळांनीही घेतली आहे. त्यांनीही असाच उपक्रम राबविण्याचा प्रयत्न सुरू केला आहे. लवकरच या शाळा सर्वांच्या दृष्टीक्षेपात येतील, असा विश्वास व्यक्त केला जातोय.