TRENDING:
पक्षी स्थलांतराचा हंगाम आणि आव्हाने
पक्षी निरीक्षक ज्ञानेश्वर गिराम यांनी सांगितले की, हिवाळ्याच्या काळात स्थलांतर करणारे पक्षी गवताळ प्रदेश, पाणथळ जागा, आणि पानझड झालेल्या वनस्पतींमध्ये आपला अधिवास शोधतात. या हंगामात राजहंस (बार हेडेड गुज), मासे खाणारी घार (ऑस्प्रे), पांढुरक्या भुरक्या, आणि भुईत्या हे परदेशी पक्षी मराठवाड्यातील विविध जलाशयांमध्ये स्थलांतर करतात. मात्र, यंदा हे पक्षी अजूनही दिसून आलेले नाहीत.
advertisement
ज्ञानेश्वर गिराम पुढे सांगतात की, तुडुंब भरलेले जलाशय, वाढलेले ध्वनी आणि वायू प्रदूषण, तसेच पक्ष्यांना सहज अन्न न मिळणे यामुळे स्थलांतरित पक्ष्यांनी जलाशयांकडे पाठ फिरवली आहे. परंतु स्थानिक पक्ष्यांची संख्या मात्र चांगली आहे.
स्थलांतरित पक्ष्यांची प्रतीक्षा आणि स्थानिक पक्ष्यांची रेलचेल
घाणेवाडी जलाशयामध्ये यंदा १९ प्रकारच्या पक्षी प्रजातींची नोंद झाली आहे, ज्यात चमचा बदक, हळदी कुंकू बदक, हिरवे कबूतर, पारवा, भारद्वाज, आणि पाकोळी यांचा समावेश आहे. याशिवाय मोठा बगळा, राखी बगळा, वंचक, आणि पानकावळा यांसारखे पक्षीही येथे आढळून आले आहेत.
हिवाळा जसजसा पुढे सरकेल, तसतसे परदेशी स्थलांतरित पक्ष्यांचे आगमन होण्याची अपेक्षा पक्षी मित्रांना आहे. परंतु त्यासाठी पर्यावरणीय अडथळे दूर करणे आवश्यक असल्याचे ज्ञानेश्वर गिराम यांनी सांगितले.