शाळेत गेली अन् परतलीच नाही, जळगावात शाळकरी मुलीचा करुण अंत, रक्ताने माखला गणवेश

नेमकं काय घडलं?

माधुरी शिवाजी मोरे (वय १३, रा. वडगाव लांबे, ता. चाळीसगाव) असं मृत पावलेल्या विद्यार्थिनीचे नाव आहे. माधुरी ही शाळेतून सुटल्यानंतर आपल्या गावी जाण्यासाठी चाळीसगाव बस स्थानकात आली होती. बस स्थानकावर प्रवाशांची गर्दी असताना, आपली बस पकडण्यासाठी ती धावली. बसमध्ये चढत असताना अचानक तिचा पाय घसरला आणि ती थेट चालत्या बसच्या चाकाखाली सापडली.

advertisement

उपचारादरम्यान मृत्यू

अपघात होताच बस स्थानकावर मोठी खळबळ उडाली. स्थानिक नागरिक आणि एसटी कर्मचाऱ्यांनी तातडीने माधुरीला जवळच्या रुग्णालयात दाखल केले. तिची प्रकृती चिंताजनक असल्याने प्राथमिक उपचारानंतर तिला पुढील उपचारासाठी धुळे येथे हलविण्यात आले. मात्र, दुर्दैवाने उपचारादरम्यान तिची प्राणज्योत मालवली. एका उमलत्या वयातील मुलीचा असा करुण अंत झाल्याने वडगाव लांबे परिसरात हळहळ व्यक्त केली जात आहे.

दोषींवर कारवाईची मागणी

या घटनेनंतर माधुरीच्या पालकांनी आणि संतप्त ग्रामस्थांनी आक्रमक पवित्रा घेतला आहे. बस स्थानकावरील नियोजनाचा अभाव आणि चालकाच्या निष्काळजीपणामुळेच आपली मुलगी गमावल्याचा आरोप पालकांनी केला आहे. या प्रकरणातील दोषींवर लवकरात लवकर कठोर कारवाई करावी, अशी मागणी मोरे कुटुंबीयांनी केली आहे. या घटनेचा अधिक तपास चाळीसगाव पोलीस करत आहेत.