महाराष्ट्र राज्य पोलीस दलातील पोलीस शिपाई तसेच कारागृह विभागातील कारागृह शिपाई संवर्गातील एक जानेवारी २०२४ ते ३१ डिसेंबर २०२५ दरम्यान रिक्त झालेली पदे तसेच १ जानेवारी २०२५ ते ३१ डिसेंबर २०२५ या कालावधीत रिक्त होणारी पदे भरण्यासाठी राबविण्याच्या भरती प्रक्रियेस मान्यता देणेबाबतचा प्रस्ताव १२ ऑगस्ट २०२५ रोजी झालेल्या मंत्रिमंडळाच्या बैठकीमध्ये सादर करण्यात आला, त्यास मंत्रिमंडळाने मान्यता दिली आहे.
advertisement
शासन कोणती पदे भरणार?
| अनुक्रमांक | पदनाम | रिक्त पदांची संख्या |
| १ | पोलीस शिपाई | १२,३९९ |
| २ | पोलीस शिपाई, चालक | २३४ |
| ३ | बॅण्डस्मन | २५ |
| ४ | सशत्र पोलीस शिपाई | २,३९३ |
| ५ | कारागृह शिपाई | ५८० |
| एकूण १५,६३१ |
१५ हजार ६३१ रिक्त पदे भरणार
वित्त विभागाच्या संशासन निर्णयान्वये ज्या प्रशासकीय विभागांनी सुधारित आकृतीबंध अंतिम मंजूर केले आहेत, अशा प्रशासकीय विभागांना सुधारित आकृतीबंधातील महाराष्ट्र लोकसेवा आयोगाच्या कक्षेतील पदे वगळता, अन्य संवर्गातील सरळसेवेच्या कोट्यातील रिक्त असलेली पदे ५० टक्के भरण्यास अनुमती देण्यात आली आहे. राज्यातील कायदा व सुव्यवस्थेच्या अनुषंगाने पोलीस शिपाई संवर्गातील पदांची अत्यंत आवश्यकता असल्याने सदर संवर्गातील १०० टक्के रिक्त पदे तातडीने भरणे आवश्यक आहे. त्यानुषंगाने महाराष्ट्र राज्य पोलीस दलातील पोलीस शिपाई तसेच कारागृह विभागातील कारागृह शिपाई संवर्गातील उपरोक्त नमूद १५,६३१ रिक्त पदे (१०० टक्के) भरण्यास वित्त विभागाच्या शासन निर्णयातील तरतूदींमधून सूट देण्यात येत आहे.
पोलीस शिपाई भरती सन २०२४-२५, OMR आधारीत लेखी परीक्षा
सामान्य प्रशासन विभागाच्या ४ मे २०२२ आणि २१ नोव्हेंबर २०२२ च्या शासन निर्णयातील तरतूदींमधून शिथिलता देऊन पोलीस शिपाई भरती सन २०२४-२५ ची भरती प्रक्रिया घटकस्तरावरुन राबविण्यास तसेच OMR आधारीत लेखी परीक्षा घेण्यास मान्यता देण्यात येत आहे.