नगरसेवक झाली, विजयी होताच घडला गुन्हा, मंत्र्याच्या मुलीवर FIR दाखल होणार?

हर्षदा शिरसाट असं गुन्हा दाखल होण्याची शक्यता असलेल्या मंत्र्याच्या मुलीचं नाव आहे. त्या सामाजिक न्याय मंत्री आणि छत्रपती संभाजीनगरचे पालकमंत्री संजय शिरसाट यांच्या कन्या आहेत. महापालिकेत विजय झाल्यानंतर शहरात जल्लोष सुरू असतानाच सत्ताधारी पक्षाच्या लोकप्रतिनिधींनी आणि त्यांच्या नातेवाईकांनी भररस्त्यात तलवारी नाचवत कायद्याचे उल्लंघन केल्याचे समोर आले आहे. पालकमंत्री संजय शिरसाट यांच्या कन्या हर्षदा शिरसाट यांनीही विजय मिरवणुकीत तलवार फिरवल्याने आता त्यांच्यावर गुन्हा दाखल होण्याची शक्यता वर्तवली जात आहे.

advertisement

नेमका प्रकार काय?

महानगरपालिका निवडणुकीत शिंदेसेनेच्या उमेदवारांनी विजय मिळवल्यानंतर शहरात ठिकठिकाणी मिरवणुका काढण्यात आल्या. यावेळी गुलाल उधळत असतानाच काही लोकप्रतिनिधींनी हातात तलवारी घेतल्या. हर्षदा शिरसाट, राजू राजपूत आणि अभिजीत जीवनवाल यांनी सार्वजनिक ठिकाणी तलवारी नाचवल्याचे व्हिडिओ सोशल मीडियावर व्हायरल झाले आहेत.

एकावर गुन्हा, मग दुसऱ्यावर का नाही?

याप्रकरणी पोलिसांनी तातडीने कारवाई करत अभिजीत जीवनवाल याच्याविरोधात वेदांतनगर पोलीस ठाण्यात शस्त्र कायद्यान्वये गुन्हा दाखल केला आहे. मात्र, याच मिरवणुकीत तलवार फिरवणाऱ्या हर्षदा शिरसाट यांच्यावर अद्याप कोणतीही कारवाई झालेली नाही. "एका उमेदवारावर गुन्हा दाखल होतो, मग पालकमंत्र्यांच्या मुलीवरही गुन्हा दाखल होणार का?" असा सवाल आता उपस्थित केला जात आहे.

कायदा आणि सुव्यवस्थेचा प्रश्न

सार्वजनिक ठिकाणी शस्त्रांचे प्रदर्शन करणे हा कायद्याने गुन्हा आहे. त्यातच सत्ताधारी पक्षाशी संबंधित व्यक्तींकडून असे कृत्य झाल्याने शहरात खळबळ उडाली आहे. पालकमंत्र्यांच्या मुलीचा तलवार फिरवतानाचा व्हिडिओ समोर आल्यानंतर आता पोलीस प्रशासन यावर काय कारवाई करणार? याकडे सगळ्यांचं लक्ष लागलं आहे.