बीडमध्ये एका साडेपाच वर्षीय चिमुरडीवर लैंगिक अत्याचार झाल्याचा धक्कादायक प्रकार उघडकीस आला आहे. नात्यातीलच मुलाने अत्याचार केल्याने मोठी खळबळ उडाली आहे. 11 नोव्हेंबर रोजी ही अत्याचाराची अमानुष घटना घडली. या घटनेनंतर मुलीला असह्य वेदना होत असतानाही ग्रामस्थांनी गावाची बदनामी नको यासाठी पीडित कुटुंबाला उपचारासाठी बीड येथे जाऊ दिले नाही. चार दिवस चिमुकली त्रास सहन करत होती.
advertisement
मुलीवर बीडच्या अतिदक्षता विभागात उपचार सुरू
अखेर मुलीच्या नात्यातील काही व्यक्तींना ही घटना समजली. त्यांनी थेट पोलीस अधीक्षक नवनीत कॉवत यांच्याशी संपर्क साधला. त्यानंतर प्रकरणाचे गांभीर्य लक्षात घेत शिरूर कासार पोलिसांनी तात्काळ गुन्हा नोंदवून घेतला. पीडित मुलीवर बीडच्या अतिदक्षता विभागात उपचार सुरू आहेत. मुलीच्या नात्यातील व्यक्तींना घटना समजल्यानंतर त्यांनी थेट पोलीस अधीक्षक नवनीत कॉवत यांना संपर्क केला. त्यानंतर शिरूर कासार पोलिसांनी गुन्हा नोंदवून घेतला आहे. चार दिवस घरात वेदना असाह्य झाल्यानंतर अखेर मुलीच्या आईने उपचारासाठी बीड गाठले आणि सध्या पीडित चिमुरडीवर बीडच्या शासकीय रुग्णालयात उपचार सुरू आहेत.
पीडित कुटुंबालाच गावकऱ्यांकडून धमकी
पीडियत मुलीच्या नात्यातीलच एका नराधमाने हे कुकर्म केल्यामुळे बदनामी नको म्हणून पीडित कुटुंबालाच गावकऱ्याकडून धमकी देण्यात येत होती. या संपूर्ण संतापजनक घटनेची आपबीती सांगत असताना पीडित मुलीच्या आईला अश्रू अनावर झाले. या नराधमावर गुन्हा दाखल होऊ नये यासाठी गावातील लोकांनी पीडित मुलीच्या आईवर प्रचंड दबाव आणल्याचा आरोप आहे. बदनामीच्या भीतीने ग्रामस्थांनी चक्क बैठका घेऊन गुन्हा दडपण्याचा प्रयत्न केला, ज्यामुळे पीडित मुलीला तब्बल चार दिवस उपचारासाठी रुग्णालयात जाऊ दिले नाही, असा संतापजनक प्रकार प्राथमिक तपासात उघड झाला आहे. पीडित मुलीची आई, आजी आणि पती रोज पोलिसांकडे जात होते, मात्र पोलिसांनी त्यांची दखल घेतली नाही.
पोलिसांवर कारवाईची मागणी
पोस्कोमधला गुन्हा तात्काळ नोंदवून घेतला पाहिजे गुन्हा नोंद करून घेण्यास दिरंगाई करणे हा देखील गुन्हाच आहे. त्यामुळे शिरूर कासार पोलिसांवर देखील या प्रकरणात कारवाई झाली पाहिजे, अशी मागणी बालकल्याण समितीचे सदस्य तत्वशील कांबळे यांनी केली आहे.