Loksabha Election : रक्षा खडसेंच्या उमेदवारीला भाजपमधूनच विरोध, 200 जणांनी दिले सामूहिक राजीनामे, जळगावात खळबळ

भाजपने देशात अनेक ठिकाणी विद्यमान खासदारांचे तिकिट कापले आहे. बहुतांश खासदारांचा पत्ता कट करण्यात आल्यानं अनेकांच्या भुवया उंचावल्या आहेत. दरम्यान, रक्षा खडसे यांना पुन्हा उमेदवारी दिली गेल्याने रावेर लोकसभा मतदारसंघातील भाजपचे पदाधिकारी आणि कार्यकर्ते नाराज झाले आहेत. पदाधिकारी, कार्यकर्त्यांनी आपली नाराजी उघड व्यक्त करत राजीनामेही दिले आहेत. रविवारी तब्बल 200 पदाधिकारी आणि कार्यकर्त्यांनी त्यांचे राजीनामे राष्ट्रीय अध्यक्ष जेपी नड्डा आणि प्रदेशाध्यक्ष चंद्रशेखर बावनकुळे यांच्याकडे पाठवले आहेत.

advertisement

रक्षा खडसेंच्या उमेदवारीला वरणगाव शहरातून तीव्र विरोध होत आहे. रक्षा खडसेंच्या उमेदवारी विरोधात 200 पदाधिकाऱ्यांचे सामूहिक राजीनामे दिले आहेत. पदाधिकारी आणि कार्यकर्त्यांनी म्हटलं की, मंत्री गिरीश महाजन यांना खडसे परिवाराकडून वारंवार टार्गेट केले जाते. मात्र खासदार रक्षा खडसे यांच्या कडून साधे उत्तर सुद्धा दिले जात नाही. दहा वर्षांत निष्ठावंत कार्यकर्त्यांकडे सातत्याने दुर्लक्ष करण्यात आल्याचा आरोपही पदाधिकारी आणि कार्यकर्त्यांनी केला.

भाजपने रावेर लोकसभा मतदारसंघातून रक्षा खडसे यांना पुन्हा उमेदवारी दिल्याने सुरू झालेले राजीनाम्याचे सत्र आता भुसावळ तालुक्यात वरणगाव शहर, परिसरात पोहोचले आहे. वरणगाव येथील पदाधिकारी व कार्यकर्ते बूथ प्रमुख व सुपर वॉरियर असे मिळून 200 जणांनी आपल्या पदाचे राजीनामा राष्ट्रीय अध्यक्ष जे पी नड्डा व प्रदेशाध्यक्ष चंद्रशेखर बावनकुळे, ग्रामविकास मंत्री गिरीश महाजन, जिल्हाध्यक्ष आमोल जावळे यांच्याकडे पाठवल्याने रावेर लोकसभा मतदारसंघात खळबळ उडाली आहे. बोदवड, मुक्ताईनगर, यावल, रावेर, चोपडा, भुसावळ व इतर तालुक्यांमध्ये रक्षा खडसे यांच्या उमेदवारीला भाजपमधून तीव्र विरोध होत आहे.