नितीन देशमुख यांना मारहाण झाल्याचे कळताच जितेंद्र आव्हाड यांनी त्यांची भेट घेऊन त्यांची विचारपूस केली. तसेच विधानसभेत मारहाणीचा मुद्दा उपस्थित करून या सगळ्या घटनेची माहिती अध्यक्षांनी घेऊन कार्यवाही करावी, अशी विनंती त्यांनी केली.
पडळकरांच्या कार्यकर्त्यांचे धमकीचे मेसेज दाखवले
विधिमंडळ परिसरात असलेल्या माध्यम कक्षात जितेंद्र आव्हाड यांनी मारहाणीचा तीव्र शब्दांत निषेध नोंदवला. सहा टर्मच्या आमदाराला धमक्यांचे फोन येत असतील, खुलेआम शिव्या दिल्या जात असतील तर आम्ही कशाला आमदार आहोत? आमच्या सुरक्षेचे काय? कोण घेणार आमची जबाबदारी? असे सवाल विचारीत ज्या गुंडांनी नितीन देशमुख यांना मारहाण केली ते मलाच विधान भवनात मारायला आले होते, असा सनसनाटी आरोप आव्हाड यांनी केला. तसेच पडळकर यांच्या कार्यकर्त्यांनी पाठवलेले धमकीचे मेसेजही दाखवले.
advertisement
अंतिम आठवडा प्रस्तावावर भाषण करून जितेंद्र आव्हाड बाहेर आले. त्याचवेळी लॉबीत असलेल्या नितीन देशमुख यांना गोपीचंद पडळकर यांच्या कार्यकर्त्यांनी मारहाण केल्याचे व्हिडीओत दिसते. जवळपास २ मिनिटे मारहाण सुरू होती. जिथून आमदार मंत्री विधान सभेत प्रवेश करतात, तिथेच ही मारहाण झाल्याने विधान भवनाच्या सुरक्षेचा प्रश्न ऐरणीवर आला आहे.
नेमकं प्रकरण काय?
गोपीचंद पडळकर आणि जितेंद्र आव्हाड यांच्यातील वादाला आठवडाभराची पार्श्वभूमी आहे. जितेंद्र आव्हाड यांनी पडळकर यांचा मंगळसूत्र चोर अशा उल्लेख केला होता. तर पडळकरांकडून आव्हाडांना अर्बन नक्सलची उपमा दिली गेली होती. काल विधान भवनाच्या द्वारात पुन्हा एकदा पडळकर आणि आव्हाड यांच्यात वाद झाला होता. कालच्या घटनेवेळी आव्हाड आणि पडळकर यांच्यासोबत जे लोक होते, तेच लोक आज पुन्हा समोर आले, तेव्हा नजरानजर होताच थेट मारहाणीला सुरुवात झाली.