Trending:

क्रिकेटर Prithvi Shaw याला कोर्टाने ठोठावला 100 रुपयांचा दंड, कायद्यासमोर क्लिन बोल्ड! नेमकं प्रकरण काय?

Published by:Saurabh Talekar

Last Updated:September 10, 2025 7:53 AM IST

Prithvi Shaw fined by Mumbai court : मॅजिस्ट्रेटच्या आदेशाला आव्हान देत सपना गिलने एप्रिल 2024 मध्ये डिंडोशी सत्र कोर्टात फौजदारी पुनरीक्षण याचिका दाखल केली. कोर्टाने पृथ्वी शॉला या याचिकेवर उत्तर देण्यासाठी अनेक तारखा दिल्या होत्या.

Prithvi Shaw Sapna Gill Case : टीम इंडियाचा युवा क्रिकेटर पृथ्वी शॉ गेल्या काही दिवसांपासून चर्चेच्या केंद्रस्थानी आहे. क्रिकेटमुळे नाही तर खासगी कारणामुळे पृथ्वी चर्चेत असतो. अशातच आता पृथ्वीला सत्र न्यायालयाने दंड ठोठावला आहे. कथित विनयभंगाच्या प्रकरणात सोशल मीडिया इन्फ्लुएंसर सपना गिल हिच्या याचिकेला उत्तर न दिल्याने मुंबईतील कोर्टाने क्रिकेटपटू पृथ्वी शॉला 100 रुपयांचा दंड ठोठावला आहे. डिंडोशी सत्र कोर्टाने शॉला वारंवार नोटीस पाठवूनही पृथ्वीने उत्तर दिलं नाही, त्यामुळे कोर्टाने हे पाऊल उचलले. कोर्टाने या प्रकरणाची पुढील सुनावणी 16 डिसेंबरपर्यंत पुढे ढकलली आहे.

नेमका वाद काय होता?

फेब्रुवारी 2023 मध्ये एका उपनगरीय हॉटेलमध्ये सेल्फी काढण्यावरून पृथ्वी शॉ आणि सपना गिल यांच्यात वाद झाला होता. त्यावेळी शॉवर हल्ला केल्याच्या आरोपाखाली गिलला काही जणांसह अटक करण्यात आली होती. जामीन मिळाल्यानंतर सपना गिलने शॉ आणि त्याचा मित्र आशिष यादव यांच्याविरोधात कथित विनयभंगाची तक्रार दाखल करण्यासाठी एअरपोर्ट पोलीस ठाण्यात संपर्क साधला होता, पण पोलिसांनी गुन्हा दाखल केला नाही. यानंतर, गिलने अंधेरी मॅजिस्ट्रेट कोर्टात धाव घेतली आणि पोलिसांना शॉ विरोधात एफआयआर नोंदवण्याचे निर्देश देण्याची मागणी केली. मात्र, मॅजिस्ट्रेटने फक्त पोलीस चौकशीचे आदेश दिले.

कोर्टात काय घडलं?

मॅजिस्ट्रेटच्या आदेशाला आव्हान देत सपना गिलने एप्रिल 2024 मध्ये डिंडोशी सत्र कोर्टात फौजदारी पुनरीक्षण याचिका (Criminal Revision Application) दाखल केली. कोर्टाने पृथ्वी शॉला या याचिकेवर उत्तर देण्यासाठी अनेक तारखा दिल्या. मात्र, मंगळवारी झालेल्या सुनावणीत शॉने कोणतेही उत्तर दाखल केले नाही. कोर्टाने म्हटले की, 'गेल्या तारखेला पृथ्वी शॉला शेवटची संधी देण्यात आली होती, पण त्याने कोणतेही उत्तर दाखल केले नाही. त्यामुळे 100 रुपयांच्या दंडासह त्याला आणखी एक संधी दिली जात आहे.'

सपना गिलचे वकील म्हणतात...

दरम्यान, सपना गिलचे वकील अली काशिफ खान यांनी सांगितले की, शॉला अनेक वेळा समन्स पाठवूनही त्याने नियमितपणे टाळाटाळ केली. आता या प्रकरणाची पुढील सुनावणी 16 डिसेंबर रोजी होणार आहे.