भाजप मुस्लिम मोहल्ल्यात सांगत होते, पैसे घ्या पण मतदान करू नका, जलील यांनी व्हिडीओ दाखवला, सावेंनी आरोप फेटाळले

राज्यातील २८८ विधानसभा मतदारसंघातील मतदान बुधवारी संपन्न झाले. अनेक ठिकाणी पैशांचे वाटप सुरू असल्याच्या तक्रारी निवडणूक आयोगाकडे आल्या.औरंगाबाद पूर्वमध्ये सत्ताधारी पक्षाचे आमदार, मंत्री अतुल सावे यांच्या कार्यकर्त्यांकडून मुस्लिम मोहल्ल्यात जाऊन पैशाचे वाटप होत असल्याचे व्हिडीओ इम्तियाज जलील यांनी दाखवले.

अनेक मुस्लिम महिलांचे आधार कार्ड भाजपा कार्यालयात जमा करून घेत असतानाचे व्हिडीओ जलील यांनी दाखवले. तसेच आम्ही तुम्हाला पैसे देतो पण तुम्ही मतदान करू नका, असे सावेंचे कार्यकर्ते मुस्लिम महिलांना म्हणत असल्याचा दावा जलील यांनी केला. तसेच दलित वस्तीत देखील असेच प्रकार काल दिवसभर सुरू होते, असा आरोप जलील यांनी केला.

advertisement

जय श्रीरामचे नारे देऊन पैसे वाटत होत असल्याचे देखील ते म्हणाले. हा सर्व प्रकार पोलीस ठाण्याच्या बाजूला असलेल्या भाजपा कार्यालयात होत होता. परंतु तरीही पोलिसांनी काही दखल घेतली नाही आणि निवडणूक आयोगाने देखील कारवाई केली नाही, असे जलील म्हणाले. तसेच लोकसभेतसुद्धा माझा पराभव जनतेने नाही तर मुख्यमंत्री शिंदे यांनी हेलिकॉप्टरमधून पैसे आणले होते, त्यामुळे झाला, असे म्हणत पोलीस आणि निवडणूक आयोगाच्या लोकांना पण सरकारकडून सांभाळून घेण्याचे आदेश होते, असेही जलील म्हणाले.

अतुल सावे यांनी आरोप फेटाळले

इम्तियाज जलील यांनी पैसेवाटपाचे केलेले आरोप अतुल सावे यांनी स्पष्टपणे फेटाळले. आमच्या कार्यकर्त्यांकडून कोणत्याही प्रकारचे पैसे वाटप झालेले नाही. जलील करीत असलेले आरोप बिनबुडाचे आहेत. त्यांना पैसे वाटपाचा अनुभव असेल, मला नाही. मी कधीही असे प्रकार करून निवडणूक जिंकलेल्या नाहीत. त्यांना असे प्रकार करून निवडणूक जिंकण्याची सवय असेल, असे सांगत अतुल सावे यांनी जलील यांचे आरोप फेटाळले.