TRENDING:
महिलांना आर्थिक संपन्न करण्याचे राज्य सरकारचे धोरण आहे. योजनेच्या माध्यमातून आम्ही महिलांना देखील एकत्र आणलं आहे. शासनाच्या योजना पोहोचविण्यासाठी जुगाड केला आहे. मतदानसाठी ही योजना आहे असा त्याचा अर्थ होत नाही. मी हिंदीत भाषण देत होतो. त्यामुळे माझ्या भाषणाचा विपर्यास केला जात आहे, अशी सारवासारव आमदार टेकचंद सावरकर यांनी विरोधकांच्या टीकेनंतर केली.
advertisement
काँग्रेस नेते सुनील केदार यांनी ही योजना बंद करण्याचे वक्तव्य केले आहे. तसेच काँग्रेसच्या संबंधित काही लोक ही योजना बंद करण्यासाठी न्यायालयात देखील गेले आहेत. काँग्रेस जवळ काहीच नाही म्हणून एडिट करून व्हिडीओ व्हायरल करताहेत. मी अनेक मेळाव्यातून मुख्यमंत्री माझी लाडकी बहीण योजनेचा प्रचार प्रसार केला आहे.
विधानसभा निवडणुकीत आम्हाला योजनेचा फायदा होणार
विरोधकांच्या टीकेचा राज्य सरकारवर कुठलाही परिणाम होत नाही. व्हिडीओ व्हायरल करणे हे विरोधकांचे कामच आहे. ही योजना जुमला आहे असं विरोधक म्हणायचे. सरकारी योजना लोकांना लाभ देण्यासाठी असतात. राज्यातील जनता मुख्यमंत्री माझी लाडकी बहीण योजनेवर प्रचंड खुश आहे. त्यामुळे याचा येणाऱ्या काळात फायदा होऊ शकतो, असेही आमदार टेकचंद सावरकर म्हणाले.
विरोधी पक्षनेते वडेट्टीवार यांचा टेकचंद सावरकर यांच्यावर हल्लाबोल
दुसरीकडे राज्याचे विरोधी पक्षनेते विजय वडेट्टीवार यांनी टेकचंद सावरकर यांच्यावर बोचरी टीका केली. महायुतीची भानगड पुढे आली असून त्यांना मतांचा दुष्काळ आहे. म्हणून लाडकी बहीण योजना मतांसाठी केलेला जुगाड आहे, असे भाजपच्या या आमदाराने मान्य केलं. महायुतीतील सर्व नेते खोटं बोलतात. लाडकी बहीण योजना माता भगिनींना लाभ देण्यासाठी नव्हे तर मत पेटीतून लाभ घेण्यासाठी आहे, अशी टीकाही वडेट्टीवार यांनी केली.