मुलांची भेट ठरली शेवटची, नागपुरात अजित पवार गटाच्या महिला नेत्याचा भीषण अपघात, जागीच मृत्यू

नेमकी दुर्घटना कशी घडली?

गीता हिंगे आणि त्यांचे पती सुशील हिंगे हे रविवारी नागपूर येथील कामे आटोपल्यानंतर आपल्या मुलांना भेटले आणि रात्री उशिरा आपल्या चारचाकी वाहनाने गडचिरोलीकडे परत येत होते. रविवारी मध्यरात्री साडेबाराच्या सुमारास गडचिरोली-नागपूर महामार्गावरील उमरेड तालुक्यातील पाचगावजवळ त्यांच्या कारला भीषण अपघात झाला.

पाचगावजवळून जात असताना, रस्त्यावरील दुभाजक ओलांडून विरुद्ध दिशेने आलेल्या एका वेगवान वाहनाने त्यांच्या कारला मागच्या बाजूने जोरदार धडक दिली. ही धडक इतकी भीषण होती की, मागच्या सीटवर बसलेल्या गीताताई हिंगे यांच्या डोक्याला गंभीर दुखापत झाली आणि या दुर्घटनेत त्यांचा जागीच मृत्यू झाला.

advertisement

या अपघातात पती सुशील हिंगे आणि कारचालक हे दोघेही गंभीर जखमी झाले आहेत. त्यांना तत्काळ उपचारासाठी नागपूर येथील एका खासगी रुग्णालयात दाखल करण्यात आले असून, त्यांच्यावर उपचार सुरू आहेत. सामाजिक आणि राजकीय क्षेत्रात सक्रिय असलेल्या गीता हिंगे यांच्या निधनाने गडचिरोली जिल्ह्यातील राजकीय आणि सामाजिक वर्तुळातून हळहळ व्यक्त होत आहे.