TRENDING:
मोखाडा तालुक्यातील खोच पिंपळपाडा येथील संकेत सुनील भोये (वय 9) हा सोमवारी पहाटे सहा वाजता शाळेसाठी उठला होता. पहाटे थंडी जास्त असल्यामुळे संकेत घराच्या अंगणात शेकोटी पेटवुन शेकत बसला होता. त्याचवेळी दबा धरून बसलेल्या बिबट्याने अचानक कुंपणावरून उडी मारत संकेतवर झडप घालण्याचा प्रयत्न केला. या अनपेक्षित प्रकाराने घरातील आजी आणि इतर सदस्य घाबरून गेले. परंतु संकेतच्या आजीने लगेचच तात्काळ आरडाओरड सुरू करताच त्याने तिथून पळ काढला. त्यामुळे संकेतचा जीव थोडक्यात वाचला. पळताना त्याचा गुडगा जखमी झाला असला तरी गंभीर दुखापत टळली आहे.
advertisement
आजीचा आरडा ओरड आणि आक्रांतामुळे सोबतच कुटुंबातील आणि आजूबाजूच्या लोकांनी बिबट्याच्या दिशेने धाव घेतल्यामुळे भेदरलेल्या बिबट्याने तेथुन पळ काढत जंगलाची वाट धरली. संकेतचे दैव बलवत्तर आणि आजीच्या धाडस व सतर्कतेमुळे नातवाचा जीव वाचला. "रोजच्या प्रमाणे सोमवारी सुद्धा सकाळी शेकोटी पेटवण्यासाठी संकेत घराच्या बाहेर आला होता. थंडी जास्त असल्यामुळे तो शेकोटीच्या समोर बसलेला होता. त्याला बिबट्याने बघितले आणि कुंपणावरून उडी मारून धावून आला. परंतु माझ्या आईसह घरातील सगळ्याच व्यक्तींनी आरडाओरड केल्याने बिबट्या तिथून पळून गेला. संकेतला कोणतीही इजा झाली नाही, परंतु पळताना त्याच्या गुडघ्याला दुखापत झाली आहे. या प्रकारामुळे आम्ही अत्यंत घाबरलो आहोत. वनविभागाने त्वरित उपाययोजना करावी," अशी मागणी संकेतचे काका (केशव भोये) यांनी केली आहे.
दरम्यान, संकेतच्या धाडसी आजीचे सर्वत्र कौतुक होत असून संध्याकाळी लहान मुले आणि नागरिकांनी विनाकारण फिरणे टाळावे, असे आवाहन वन विभागाकडून करण्यात आले आहे. रात्री सायरन वाजवत गाडीने गाव पाड्यावर गस्त घालत असल्याची माहिती सुद्धा वन विभागाने सांगितली आहे.