संगमनेर हादरले! सहावीत शिकणाऱ्या चिमुरडीवर अ‍ॅसिड हल्ला; शाळेतून घरी जाताना नराधमाचे कृत्य

वडगाव पान येथील जिल्हा परिषद शाळेत ही मुलगी शिक्षण घेत आहे. नेहमीप्रमाणे शाळा सुटल्यानंतर ती आपल्या घराच्या दिशेने चालली होती. यावेळी वाटेत दबा धरून बसलेल्या एका अज्ञात युवकाने अचानक तिच्यासमोर येऊन तिच्या चेहऱ्यावर अ‍ॅसिड फेकले. अ‍ॅसिड पडताच वेदनेने विव्हळत मुलीने आरडाओरड करण्यास सुरुवात केली. तिचा आवाज ऐकून आसपासचे नागरिक मदतीसाठी धावले, मात्र तोपर्यंत आरोपी घटनास्थळावरून पसार झाला होता.

advertisement

उपचारासाठी लोणीला हलवले

घटनेची माहिती मिळताच ग्रामस्थांनी जखमी मुलीला तातडीने उपचारासाठी हलवले. प्रकृतीचे गांभीर्य लक्षात घेता तिला पुढील उपचारासाठी लोणी येथील प्रवरा रुग्णालयात दाखल करण्यात आले आहे. तिची प्रकृती सध्या स्थिर असली तरी या हल्ल्यामुळे तिला शारीरिक आणि मानसिक मोठा धक्का बसला आहे. घटनेची माहिती मिळताच संगमनेर पोलिसांनी तातडीने घटनास्थळी धाव घेऊन पंचनामा केला.

तालुक्यात दहशतीचे वातावरण

दोन दिवसांपूर्वीच रणखांब गावात लग्नाला नकार दिल्याने एका तरुणीवर प्राणघातक हल्ला झाला होता. ही घटना ताजी असतानाच आता एका शालेय विद्यार्थिनीवर अ‍ॅसिड हल्ला झाल्याने संगमनेर तालुका हादरला आहे. या नराधमाला तातडीने अटक करून फाशीची शिक्षा द्यावी, अशी मागणी ग्रामस्थांनी केली आहे.