सुरेश धस यांच्या पोराने अपघातात ज्या उद्योजकाला उडवले, तिथेच त्यांच्या वडिलांचा आणि काकांचाही मृत्यू

पारनेर तालुक्यातील जातेगाव फाटा येथे ७ जुलै रोजी रात्री १०.३० वाजता झालेल्या अपघातात नितीन प्रकाश शेळके या हॉटेल व्यावसायिकाचा मृत्यू झाला. भाजप आमदार सुरेश धस यांचा मुलगा सागर धस याच्या एम.जी. ग्लॉस्टर कारने (MH 23 BG 2929) उद्योजक शेळके यांच्या दुचाकीला धडक दिली. शेळके हे मोटारसायकलवरून यु-टर्न घेत असताना भरधाव कारने जोरदार धडक दिली.

advertisement

अपघात कसा झाला?

मयत नितीन शेळके हे सह्याद्री खादी हॉटेलवरून आपल्या गावाकडे मोटारसायकलने निघाले होते. जातेगाव फाटा येथे महामार्गावर यु-टर्न घेत असताना पुण्याकडे भरधाव वेगाने जाणाऱ्या एम. जी. ग्लॉस्टर कारने सोमवारी रात्री साडे दहाच्या सुमारास त्यांच्या दुचाकीला जोरदार धडक दिली. अपघातात ते रस्त्यावर फेकले गेले आणि गंभीर जखमी झाले. नागरिकांनी त्यांना तातडीने सुपा येथील रुग्णालयात दाखल केले, मात्र डॉक्टरांनी त्यांना मृत घोषित केले.

उद्योजकाला मारले तिथेच त्यांच्या वडिलांचा आणि काकांचाही मृत्यू

अपघातात गंभीर जखमी झालेल्या शेळके यांचा उपचारापूर्वीच मृत्यू झाला. घटनेनंतर सुपा पोलीस ठाण्यात सागर धस याच्याविरुद्ध गुन्हा दाखल करण्यात आला असून, पोलिसांनी त्याला ताब्यात घेतले आहे. मृत नितीन शेळके यांच्या कुटुंबावर दुःखाचा डोंगर कोसळला आहे. दु:खद गोष्ट म्हणजे नितीन शेळके यांच्या अपघाती निधनाच्या जागेवरच त्यांचे वडील आणि चुलत्याचाही अपघाती मृत्यू झाला होता.

जातेगाव फाट्यावर गेल्या काही वर्षात 25 ते 26 अपघात या घटनास्थळी घडले आहेत. यापूर्वी स्थानिक नागरिकांनी या रस्त्यासंबंधी काहीतरी उपाययोजना कराव्यात, अशी मागणी केली होती. मात्र प्रशासनाने त्याकडे साफ दुर्लक्ष केले. त्यामुळे ठराविक काही महिन्यांनी अपघात होत असल्याचे स्थानिक नागरिकांचे म्हणणे आहे.