TRENDING:
रात्री १० ते पहाटे ५ या वेळेत पुलाखालील मार्गावरून वाहतूक वळवण्यात आली आहे. या बदलांमुळे रात्री उशिरा प्रवास करणाऱ्यांना मोठा मनस्ताप सहन करावा लागणार आहे. शिवाय रात्रीच्या सुमारास या भागातून अवजड वाहनांची वाहतूक होत असते, त्यामुळे या परिसरात मोठ्या प्रमाणात वाहतूक कोंडी होण्याची शक्यता वर्तवली जात आहे.
ठाणे वाहतूक शाखेने याबाबत अधिसूचना जारी केली आहे. पूर्व द्रुतगती महामार्गाशेजारील ज्युपिटर रुग्णालयाजवळ माजिवडा मेट्रो स्थानकाचे काम सुरू असून त्यावर छत उभारण्यासाठी कॉलम उभे केले जाणार आहेत. या कामादरम्यान जॅक बीम टाकून त्यावर राफ्टर उभारले जाईल. हे काम ६० टनी मोबाइल क्रेनच्या साह्याने होणार आहे. रात्री १० वाजता ही क्रेन ज्युपिटर रुग्णालयासमोरील माजिवडा उड्डाणपुलाच्या चढणीवर उभी करण्यात येणार आहे. पहाटे ५ वाजेपर्यंत हे काम सुरू राहणार आहे. त्यामुळे या पुलावरून घोडबंदर रोड व नाशिककडे जाणारी सर्वच प्रकारची वाहने पुलाखालील मार्गिकेवरून पुढे जातील, असे ठाणे वाहतूक शाखेच्या अधिसूचनेत नमूद करण्यात आले आहे.
advertisement
या पर्यायी मार्गांचा वापर
मुंबईकडून नाशिक आणि घोडबंदर रोडकडे जाणारी सर्व प्रकारची वाहने रात्री १० वाजल्यानंतर माजिवडा उड्डाणपुलावरून न जाता, पुलाखालून कापूरबावडी सर्कल येथून पुढे मार्गक्रमण करतील. पण यामुळे कापूरबावडी सर्कलवर मोठी कोंडी होण्याची शक्यता आहे. याचा कॅडबरी जंक्शनपर्यंत परिणाम होऊन या ठिकाणीही कोंडी होण्याची शक्यता आहे.