राज्याचे पर्यटन मंत्री शंभूराज देसाई यांनी महाबळेश्वर-तापोळा आणि कोयनानगर-नेहरूनगर या दोन ठिकाणी 'जॉय मिनी ट्रेन' सुरू करण्यासाठी प्रस्ताव तयार करण्याचे निर्देश दिले आहेत. सध्या राज्यात माथेरान येथे टॉय ट्रेन चालवली जाते. या ट्रेनला पर्यटकांचा चांगला प्रतिसाद मिळतो. याच धर्तीवर जॉय ट्रेनचा उपक्रम सुरू केला जाणार आहे. यासाठी विविध परवान्यांची गरज लागणार आहे. याशिवाय, सर्व तांत्रिक बाबी तसेच या उपक्रमातून किती आर्थिक नफा मिळेल, या बाबी विचारात घेऊन एक प्रस्ताव तयार करण्याचे निर्देश मंत्री शंभूराज देसाई यांनी दिली आहेत.
advertisement
Kolhapur News: कोल्हापुरात येणार खास शिवकालीन वस्तू! नागरिकांना मिळणार प्रत्यक्ष अनुभव
पर्यटन मंत्री शंभूराज देसाई यांनी नुकतीच आपल्या सरकारी निवासस्थानी याबाबत एक बैठक घेतली. याबैठकीला पर्यटन विभागाचे मुख्य सचिव डॉ. अतुल पाटणे, पर्यटन संचालक डॉ. बी.एन. पाटील आणि महाराष्ट्र पर्यटन विकास महामंडळाचे व्यवस्थापकीय संचालक नीलेश गटणे उपस्थित होते. यावेळी बोलताना देसाई म्हणाले की, महत्त्वाच्या ठिकाणी पर्यटकांना आकर्षित करणाऱ्यासाठी 'जॉय मिनी ट्रेन' हा अत्यंत लोकप्रिय उपक्रम आहे. देशातील काही ठिकाणी या ट्रेनला मोठ्या प्रमाणात यश मिळालं आहे. त्यामुळे महाराष्ट्रात देखील हा उपक्रम राबवला तर फायदा होईल.
मोदींच्या पंच्याहत्तरीनिमित्त नमो पर्यटन कौशल्य कार्यक्रम
देशाचे प्रधानमंत्री नरेंद्र मोदी यांचा नुकताच 75 वा वाढदिवस साजरा झाला. या वाढदिवसाचं औचित्य साधून पर्यटन विभागामार्फत दोन विशेष उपक्रम सुरू करण्यात आले आहेत. राज्यातील 7500 युवांना प्रशिक्षण देण्यासाठी 'नमो पर्यटन कौशल्य कार्यक्रम' आणि पाच ठिकाणी पर्यटकांना सुविधा देणारे 'नमो पर्यटन माहिती व सुविधा केंद्र' उभारण्यात येणार आहे. या उपक्रमामुळे स्थानिक अर्थव्यवस्थेला बळकटी मिळेल, अशी माहिती पर्यटन मंत्री शंभूराज देसाई यांनी दिली.