TRENDING:
मुंबईसह उपनगरात थंडी वाढली आहे. डिटवाह पश्चिम बंगालच्या खाडीमध्ये 30 नोव्हेंबरपर्यंत राहणार आहे. त्याचा परिणाम म्हणून आंध्र प्रदेश, तामिळनाडू या भागांमध्ये पुढचे 72 तास अतिवृष्टीचा इशारा देण्यात आला आहे. रायलसीमा भागात 1 डिसेंबरपर्यंत अति मुसळधार पावसाचा इशारा देण्यात आला आहे.
सेन्यारचा इफेक्ट ओसरला पण डिटवाहचा धोका कायम
दक्षिण पश्चिम बंगालच्या उपसागरात डिटवाह चक्रीवादळानं तीव्र रुप धारण केलं आहे. सेन्यार चक्रीवादळाचा दबाव कमी झाला आहे. तर गुजरात आणि राजस्थान भागात सायक्लोनिक सर्क्युलेशन तयार झालं आहे. आजपासून 4 डिग्री तापमान खाली घसरणार आहे. महाराष्ट्रात देखील पुढच्या तीन दिवसांत हीच परिस्थिती राहणार आहे. त्यानंतर हवामानात कोणतेही बदल होणार नाही.
advertisement
महाराष्ट्रात कसं राहिल हवामान?
महाराष्ट्रात विदर्भ आणि मराठवाड्यात थंडीची लाट येणार आहे. ३ डिसेंबरपर्यंत तळकोकण आणि पश्चिम महाराष्ट्रात ढगाळ वातावरण राहण्याची शक्यता आहे. तर विदर्भात थंडी कायम राहणार आहे. कोकण आणि पश्चिम महाराष्ट्रात काही भागांत हलक्या सरी बरसणार आहेत.
राजस्थानकडे सायक्लोनिक सर्क्युलेशन
राजस्थान आणि गुजरातकडून येणाऱ्या थंड वाऱ्यांमुळे महाराष्ट्रातही थंडी वाढण्याची शक्यता आहे. पुणे, शिरुर, उत्तर महाराष्ट्रात आधीच थंडी वाढली आहे. त्यात आणखी 4 डिग्रीने तापमान खाली घसरण्याची शक्यता आहे. डिसेंबर आणि जानेवारीत सर्वात जास्त तापमान घसरण्याची शक्यता आहे. यंदा ला निनाचा इफेक्ट भारतावर राहणार आहे असा हवामान विभागाने अंदाज वर्तवला होता. त्यामुळे आता कडाक्याच्या थंडीसाठी तयार राहावं लागेल.
डिटवाह चक्रीवादळामुळे कोकणासह पश्चिम महाराष्ट्रातील कमाल तापमानात चांगलीच वाढ झाली आहे. कमाल तापमान 35-36 डिग्री सेल्सियसपर्यंत पोहोचल्याने दिवसा भयंकर उकाडा जाणवत आहे. तर रात्री उशिरा आणि पहाटे थंडी पडत आहे. विचित्र हवामानामुळे लोक हैराण झाले आहेत. २९-३० डिसेंबर रोजी विदर्भातही काही ठिकाणी तुरळक पावसाच्या सरींची शक्यता वर्तवली आहे.