TRENDING:
मुंबईसह उपनगरामध्ये अनेक ठिकाणी रॅपिडो गाड्यांचा वापर केला जातो. गेल्या अनेक महिन्यांपासून सर्वत्र रॅपिडो वाहतूक सेवा सुरू आहे. यामध्ये दुचाकी, रिक्षा आणि चारचाकीच्या माध्यमातून प्रवाशांना सेवा पुरवली जाते आहे. आता अशातच प्रवाशांना सुविधा पुरवणाऱ्या ह्या कंपनीला राज्य सरकारने आणि आरटीओने चांगलाच दणका दिला आहे. विनापरवाना सुरू असलेल्या रॅपिडो कंपनीच्या विरोधात धडक कारवाई सुरू केली आहे. मुंबई उपनगरांत आरटीओने या धडक कारवाईला सुरूवात केली आहे. नेहरूनगर आणि पंतनगर पोलिस ठाण्यामध्ये रॅपिडो कंपनीच्या डायरेक्टरविरोधात गुन्हा दाखल करण्यात आला आहे.
advertisement
कुर्ला नेहरूनगर परिसरात 2 डिसेंबर रोजी, तर घाटकोपर परिसरात 3 डिसेंबर रोजी आरटीओनेही बेधडक कारवाई केली आहे. घाटकोपरच्या लक्ष्मीनगर परिसरात आणि कुर्ला नेहरूनगर एसटी डेपो परिसरात आरटीओ अधिकाऱ्यांनी रॅपिडो बुक करत कारवाई केली. सरकारने अलीकडेच, ई- बाईक धोरण जाहीर केली. त्याच आधारावर मुंबईसह परिसरात आरटीओकडून कारवाई केली जात आहे. अवैध बाईकमुळे अनेकदा निर्दोष प्रवाशांना किंवा चालकाला त्याचा त्रास सहन करावा लागतो. या अवैध गाड्या मुंबईमध्ये सर्रास सुरू असल्यामुळे आरटीओ विभागाने कारवाईचा बडगा उचलला आहे. बेकायदेशीर गाडी चालवणाऱ्यांवर आरटीओ सध्या बेधडक कारवाई करत आहे.
जितक्या बाइक बेकायदेशीर वाहतूक करताना आढळतील, तितके गुन्हे संबंधित चालकावर न दाखल करता ती बाइक ज्या ॲप आधारित कंपनीची आहे. त्या कंपनीच्या मालकावर गुन्हे दाखल करण्यात येतील, असा सज्जड दम परिवहन मंत्री प्रताप सरनाईक यांनी दिला आहे. त्याच आधारावर 2 डिसेंबर रोजी रॅपिडो ॲप कंपनीविरोधात आरटीओने मुंबईतील घाटकोपर पोलीस ठाण्यात गुन्हा दाखल केला आहे. 'रॅपिडो' कंपनीवर मोटार वाहन कायदा, 1988 च्या कलम 66 (1) आणि 192 अन्वये बेकायदेशीररीत्या 'बाइक टॅक्सी' चालवल्याप्रकरणी कारवाई करण्यात आली आहे.
मुंबई आरटीओच्या मोटार वाहन निरीक्षकांनी केलेल्या तपासणीत रॅपिडो म्हणजे रोपन ट्रान्सपोर्ट कंपनी 'राइड शेअरिंगच्या नावाखाली प्रवाशांची वाहतूक करत असल्याचे उघड झाले. विशेष म्हणजे कंपनीने प्रवासासाठी वापरलेली वाहने ही खासगी मालकीची होती. मोटार वाहन कायद्यानुसार, खासगी वाहने प्रवासी वाहतुकीसाठी वापरण्यास सक्त मनाई आहे. असे असतानाही, कंपनीने नफा मिळवण्याच्या उद्देशाने या नियमांचे उल्लंघन केले.