ओमनी गाडीवर सिमेंटने भरलेला ट्रक उलटला. गाडीचा अक्षरश: चुराडा झाला. हा संपूर्ण प्रकार पाहून घाबरलेला ट्रक चालक फरार झाला. अपघाताची माहिती मिळताच पोलिसांनी घटनास्थळी धाव घेतली असून जखमींना रुग्णालयात दाखल केलं आणि मृतदेह ताब्यात घेतले. या भीषण अपघातात 9 लोकांचा मृत्यू झाला आहे.
मध्य प्रदेशातील झाबुआ जिल्ह्यात बुधवारी पहाटे भीषण अपघात झाला. थांदला-मेघनगर भागातील संजोली रेल्वे फाटकाजवळ झालेल्या या भीषण अपघातात दोन कुटुंबांतील 9 लोकांचा दुर्दैवी मृत्यू झाला. मृतांमध्ये 4 लहान मुलं, 3 महिला आणि 2 पुरुषांचा समावेश आहे. या अपघातात 1 महिला आणि 1 लहान मुलगी गंभीर जखमी असून, त्यांना उपचारासाठी रुग्णालयात दाखल करण्यात आलं.
advertisement
एका भरधाव ट्रक आणि व्हॅन यांच्यात जोरदार धडक झाली. धडक इतकी भीषण होती की, ट्रक अनियंत्रित होऊन इको व्हॅनवरच उलटला. त्यामुळे व्हॅनमध्ये असलेले लोक आत अडकले. मृतांपैकी 8 जण थांदला येथील शिवगड महुदा गावाचे रहिवासी असल्याचे सांगण्यात येत आहे. हे सर्वजण कल्याणपुरा जवळील भावपुरा गावातून एका विवाह सोहळ्याहून परत येत असताना हा अपघात झाला.
अपघातानंतर आजूबाजूचे लोक आणि वाटसरू किंकाळ्या ऐकून तात्काळ घटनास्थळी धावले. त्यांनी तातडीने बचावकार्य सुरू केले आणि गाडीच्या काचा फोडून आत अडकलेल्या लोकांना बाहेर काढले. घटनेची माहिती पोलिसांना देण्यात आली, त्यानंतर पोलिसांनी जखमींना तात्काळ सामुदायिक आरोग्य केंद्र (CHC) शाहाबाद येथे दाखल केले. मात्र, उपचारादरम्यान 5 जणांचा मृत्यू झाला.