HSRP नंबर प्लेट न लावणाऱ्या त्या 70 टक्के लोकांवर काय होणार कारवाई? सरकारकडून नवीन अपडेट

महाराष्ट्रामध्ये सर्वच वाहनांना हाय सिक्युरिटी नंबर प्लेट (High Security Registration Plate ) लावण्याबद्दल आदेश काढण्यात आला होता. मागील तीन महिन्यांपासून ही प्रक्रिया सुरू होती. पण अजूनही अनेक वाहनधारकांनी HSRP नंबर प्लेट लावल्या नाहीत. जवळपास ही संख्या ७० टक्के आहे. मात्र, आता महाराष्ट्र सरकारने HSRP नंबर प्लेट लावण्यासाठी मुदत वाढ देण्यात आली आहे. त्यामुळे ७० टक्के लोकांना मोठा दिलासा मिळाला आहे.

राज्य शासनाने दिनांक १ एप्रिल २०१९ पूर्वी नोंदणी केलेल्या वाहनांना उच्च सुरक्षा नोंदणी क्रमांक (HSRP) पाटी बसविण्याबाबतचा निर्णय घेतला होता. अशा जुन्या वाहनांना १५ ऑगस्ट २०२५ पर्यंत मुदत देण्यात आली होती. पण ही पाटी बसविण्यासाठी वाहन मालकांकडून अल्प प्रतिसाद मिळाला.

राज्यात सुरक्षा क्रमांक पाटी (एचएसआरपी) लावणाऱ्यांची टक्केवारी अतिशय मोजकी आहे. आतापर्यंत २० टक्के वाहनांनाच एचएसआरपी पाटी लागली आहे. तसेच १० टक्के वाहनधारकांनी पाटी लावण्यासाठी वेळ घेतली आहे. महत्त्वाची गोष्ट म्हणजे जुन्या वाहनांपैकी अजूनही ७० टक्के वाहनधारकांनी एचएसआरपी पाटी लावली नसल्याचे सांगितले जाते.

आता १ एप्रिल २०१९ पूर्वी नोंदणी झालेल्या जुन्या वाहनांना उच्च सुरक्षा नोंदणी क्रमांक (एचएसआरपी) पाटी बसविण्याकरिता ३० नोव्हेंबर २०२५ पर्यंत अंतिम मुदत देण्यात आली आहे.

वाहन मालकांनी वाहनांवर उच्च सुरक्षा नोंदणी क्रमांक (एचएसआरपी) बसविण्यासाठी परिवहन विभागाच्या http://transport.maharashtra.gov.in या संकेतस्थळावर जाऊन उच्च सुरक्षा नोंदणी क्रमांक पाटी बसविण्याकरिता ३० नोव्हेंबर २०२५ पर्यंत अपॉईंटमेंट घ्यावी. त्यानंतर उच्च सुरक्षा नोंदणी क्रमांक पाटी (एचएसआरपी) न बसविणाऱ्या वाहनांवर १ डिसेंबर २०२५ नंतर वायुवेग पथकाद्वारे नियमांनुसार कारवाई करण्यात येणार आहे.

दरम्यान, दिनांक ३० नोव्हेंबर २०२५ पर्यंत एचएसआरपी बसविण्यासाठी अपॉइंटमेंट मिळालेल्या वाहनांवर कोणतीही कारवाई करण्यात येणार नाही, याची सर्व संबंधित वाहन मालकांनी नोंद घ्यावी.

मात्र, एक एप्रिल २०१९ पूर्वी नोंदणी असलेल्या वाहनधारकांनी उच्च सुरक्षा क्रमांक पाटी वाहनावर बसविण्यात यावी, असे आवाहन सह परिवहन आयुक्त शैलेश कामत यांनी केले आहे.

पोलीस रस्त्यावर थांबवून वाहनांची तपासणी करतात. जर HSRP नसेल, तर थेट दंड आकारला जातो. काही वेळा वाहन जप्त होण्याची शक्यताही असते, पण आता ३० नोव्हेंबरपर्यंत सर्वांना दिलासा मिळाला आहे.