फक्त Bigg Boss मध्येच दिसते! तरी मुंबई-दुबईत कोट्यवधीचं घरं; राखी सावंत वर्षभर असं करते काय?

बिग बॉस आणि राखी सावंत म्हणजे एक समीकरणच म्हणावं लागेल. हिंदी आणि मराठी दोन्ही बिग बॉसमध्ये राखी सावंत दिसली आहे. मग ते सुरुवातीपासून असो वा वाइल्ड कार्ड एंट्री. बहुतेक बिग बॉसमध्ये राखी सावंत वाइल्ड कार्ड एंट्रीने आली आहे. आताही बिग बॉस मराठीच्या सहाव्या सीझनमध्ये वाइल्ड कार्ड एंट्री घेत तिने धुमाकूळ घातला आहे.

पण तुम्ही पाहिलं असेल बिग बॉस सुरू झालं की राखीच्या नावाची चर्चा सुरू होते, राखी तेव्हाच दिसू लागते. ना कोणती सीरिअल, ना कोणती फिल्म, ना कोणतं गाणं... फक्त बिग बॉस... तरी राखी कोट्यवधींच्या संपत्तीची मालकीण आहे. हे कसं काय? बिग बॉस नसतं तेव्हा राखी काय करते, ती इतके पैसे कसे कमवते, तिच्या कमाईचा मार्ग काय?

राखीनं एका मुलाखतीत सांगितलं होतं की, 10 वर्षांची असताना तिनं कॅटेरिंगमध्ये वाढपी म्हणून काम केलं. या कामाचे तिला 50 रुपये मिळायचे. 11 वर्षांची असताना राखीनं एका दांडीया इव्हेंटमध्ये सहभाग घेतला. ज्यामुळे तिच्या आईनं तिला खूप मारलं होतं. पण राखीला या इंडस्ट्रीबद्दल खूप आकर्षण होतं. तिनं आई-वडिलांच्या विरोधात जाऊन हिरोईन होण्याचा निर्णय घेतला.

चित्रपटात काम मिळवणं राखीला सुरुवातीला फार कठीण गेले. तिच्या रंगरूपामुळे अनेक निर्माते तिला भूमिका देण्यास तयार नव्हते.   सावळ्या रंगामुळे तिला अनेक रिजेक्शन झेलावं लागलं. त्यानंतर तिनं तिच्या चेहऱ्याची सर्जरी केली. तिने शस्त्रक्रिया करून आपला लूक बदलला आणि अखेर तिला चित्रपटात संधी मिळू लागल्या.

1997 साली तिला अग्निचक्र हा पहिला सिनेमा मिळाला. त्यानंतर जोरू का गुलाम, ये रास्ते हैं प्यार के, जिस देश में गंगा रहता हैं सारख्या सिनेमात तिनं काम केलं. फराह खानच्या 'मैं हूं ना' या चित्रपटात तिला संधी मिळाली. या भूमिकेतही तिला पसंत केले गेले.

त्यानंतर मात्र या चित्रपटानंतर तिला अभिनय क्षेत्रात जम बसवता आला नाही. यानंतर तिने डान्समध्ये करिअर करण्याचा निर्णय घेतला. राखीने अनेक सुपरहिट बॉलिवूड चित्रपटांमध्ये आयटम साँग केलं. एक काळ असा होता जेव्हा राखीला बी-टाऊनची टॉप आयटम गर्ल म्हटलं जायचं. 2003 साली राखीचं मोहब्बत है मिर्ची हे गाणं तुफान हिट झालं.

2006मध्ये राखी पहिल्यांदा बिग बॉसमध्ये दिसली. त्यानंतर राखी का स्वयंवर मधून राखी चर्चेत आली. नंतर ती बिग बॉसमध्येच दिसू लागली. राखीने नंतर कोणतेही आयटम साँग केलेले नाही. तसंच ती कोणत्याही चित्रपटात किंवा मालिकेत दिसली नाही, तरीही ती लक्झरी लाइफ जगते.

राखीने एका मुलाखतीत सांगितलं होतं की,  बुर्ज खलिफामध्ये माझे 4-5 फ्लॅट आहेत. अनेक व्हिला आहेत, मी नाश्त्यात बकलावा-हकलावा खाते. खजूर, तूप अशा सर्व गोष्टींनी मी अंघोळ करते. सोन्या-चांदीच्या दागिन्यांनी विणलेल्या साड्या मी निसते, माझ्याकडे 200 बॉडीगार्ड आहेत. मला घरात बाथरुमला जरी जायचं असेल तरी मी सायकलचा वापर करते. माझं घर खूप मोठं आहे"

मीडिया रिपोर्ट्सनुसार राखी सावंतकडे 37 कोटी रुपयांपेक्षा जास्त संपत्ती आहे. तिचे मुंबई आणि दुबईमध्ये आलिशान घरं असून तिच्याकडे अनेक आलिशान गाड्यांही आहेत. राखीचं मुंबईतील अंधेरी येथे स्वत:चं घरं आहे. जुहूमध्ये 2 बंगल्यांची ती मालकीण आहे. चित्रपटांव्यतिरिक्त राखी सावंत रिअॅलिटी शो, जाहिरात शूट, ब्रँड प्रमोशन तसेच सोशल मीडियाच्या माध्यमातून भरपूर पैसे कमवते.