'महाराष्ट्राची हास्यजत्रा' फेम अभिनेत्याचा अपघात; गंभीर दुखापत, तातडीने शस्त्रक्रिया

महाराष्ट्राची हास्यजत्रा हा कॉमेडी शो, ज्यातील कलाकार खळखळून प्रेक्षकांना हसवतात. या शोमधून घराघरात पोहोचलेला एक विनोदी अभिनेता, ज्याचा अपघात झाला आहे.

हा अभिनेता आहे विराज जगताप. बदलापुरात राहणारा विराज, जो त्याच्या मित्राकडे कार्यक्रमासाठी गेला होता. रात्री घरी परतत असताना त्याचा अपघात झाला.

बदलापुरातील आदर्श विद्या मंदिराजवळ विराजचा अपघात झाला आहे. मंगळवारी 24 मार्च रोजी रात्री 10 च्या सुमारास ही घटना घडली आहे.

आदर्श विद्या मंदिरजवळ एक अवाढव्या स्पीड ब्रेकर होता, ज्याचा अंदाज विराजला आला नाही आणि त्याची गाडी स्पीड ब्रेकरवर आदळली.

गाडी स्पीड ब्रेकरवर आदळताच विराजचा गाडीवरील ताबा सुटला आणि तो गाडीसह कोसळला. अपघातात विराजच्या हाताला गंभीर दुखापत झाल्याची माहिती आहे. त्याच्या मनगटावर तातडीने शस्त्रक्रिया करावी लागली.

विराज अगदी सामान्य कुटुंबातील मुलगा आहे. काही वर्षांपूर्वी त्याच्या वडिलांचं निधन झालं तेव्हापासून घरची संपूर्ण जबाबदारी त्याची आहे.

'महाराष्ट्राची हास्यजत्रा'मध्ये विराज छोट्या-मोठ्या भूमिका साकारतो. पण त्याने साकारलेल्या भूमिकांचं विशेष कौतुकही होताना दिसतं.