Rinku Rajguru : 24 वर्षांची 'आर्ची' झाली वारकरी, मराठमोळ्या शृंगाराने जिंकली मन, रिंकू राजगुरुचे खास PHOTO

'सैराट' चित्रपटातील 'आर्ची' या डॅशिंग भूमिकेने महाराष्ट्राच्या घराघरात पोहोचलेली अभिनेत्री रिंकू राजगुरू पुन्हा एकदा चर्चेत आहे, पण यावेळी तिच्या भूमिकेमुळे नाही, तर तिच्या अत्यंत साध्या आणि भक्तिमय अवतारामुळे.

आषाढी वारीच्या पवित्र सोहळ्यात रिंकूने यंदा आपल्या वडिलांसोबत सहभाग घेतला. हातात टाळ, कपाळी गंध, पारंपरिक नऊवारी साडी आणि डोक्यावर तुळशीचे वृंदावन घेऊन रिंकूने वारीत सहभाग घेतला.

रिंकू चक्क एका वारकऱ्याच्या रूपात विठूमाऊलीच्या भेटीला निघालेली पाहून तिचे चाहते अक्षरशः भारावून गेले आहेत. तिचा पारंपारिक अवतार पाहून सर्वांनी तिचं कौतुक केलं.

रिंकूने वारीतील आपला अनुभव आणि भावना व्यक्त करणारा एक खास व्हिडिओ इन्स्टाग्रामवर शेअर केला आहे. रिंकूने लिहिले आहे, "जय जय राम कृष्ण हरी! मी वयाच्या 4 थ्या वर्षी माझ्या बाबांसोबत वारीत गेले होते. आज तब्बल 20 वर्षांनी पुन्हा तेच क्षण जगतेय... हे क्षण माझ्या हृदयात कायमचे कोरले गेले आहेत."

वडिलांसोबत पुन्हा त्याच श्रद्धेने वारीचा अनुभव घेणे, ही तिच्यासाठी केवळ एक धार्मिक यात्रा नसून, भावनिक आणि आत्मिक समाधान देणारा क्षण ठरला.

ती वडिलांसोबत फुगडी खेळताना आणि इतर महिला वारकऱ्यांमध्ये मिसळून पारंपरिक खेळांमध्ये सहभागी होताना दिसली. तिच्या आनंदात भक्तीची झलक स्पष्टपणे दिसत होती.

दरवर्षी आषाढ शुद्ध एकादशीच्या निमित्ताने पंढरपूरच्या विठ्ठल-रखुमाईच्या भेटीसाठी लाखो वारकरी शेकडो किलोमीटरची पायपीट करत पंढरपूरकडे जातात. भजन, किर्तनात दंग होऊन, हरीनामाचा जप करत वारकरी विठोबाच्या दर्शनासाठी पंढरपूरकडे वाटचाल करतात.