Salman Khan Warrant: सलमान खानच्या विरोधात वॉरंट! आता अटक निश्चित? पण नेमकं झालं तरी काय

बॉलिवूडचा 'सुलतान' सलमान खान पुन्हा एकदा कायदेशीर कचाट्यात सापडला आहे. यावेळी प्रकरण काळवीट शिकार किंवा 'हिट अँड रन'चं नाही, तर एका दाव्याचं आणि जाहिरातीचं आहे.

जयपूरच्या जिल्हा ग्राहक आयोगाने सलमान खानच्या नावाने जामीनपात्र वॉरंट जारी केला असून, त्याला ६ फेब्रुवारी रोजी न्यायालयात व्यक्तिशः हजर राहण्याचे कडक निर्देश दिले आहेत. 'राजश्री पान मसाला'च्या एका जाहिरातीवरून हा संपूर्ण गदारोळ सुरू झाला आहे.

नेमकं प्रकरण असं आहे की, सलमान खान 'राजश्री पान मसाला' या उत्पादनाची जाहिरात करतो. या जाहिरातीत हे उत्पादन केसरयुक्त असल्याचा दावा करण्यात आला आहे. मात्र, याचिकाकर्ते योगेंद्र सिंह यांनी यावर आक्षेप घेत ग्राहक न्यायालयात धाव घेतली. "अशा जाहिरातींमधून ग्राहकांची दिशाभूल केली जात आहे," असा आरोप त्यांनी केला आहे.

या प्रकरणाची गंभीर दखल घेत आयोगाने ६ जानेवारी रोजीच या जाहिरातीच्या प्रसारणावर आणि प्रदर्शनावर बंदी घालण्याचे आदेश दिले होते. मात्र, न्यायालयाच्या या आदेशाची पायमल्ली झाल्याचं समोर आलं आहे.

आयोगाचे अध्यक्ष ग्यारसी लाल मीणा यांनी या प्रकरणात कठोर पवित्रा घेतला आहे. ६ जानेवारीला बंदी घातली असतानाही, ९ जानेवारी रोजी कोटा येथील नयापुरा स्टेडियमसमोर या जाहिरातीचे मोठे साइन बोर्ड्स झळकत होते. न्यायालयाच्या आदेशाचा उघडपणे झालेला हा अपमान पाहून आयोगाने अवमान याचिका दाखल करून घेतली.

आयोगाने जयपूर पोलीस आयुक्तांना स्पष्ट निर्देश दिले आहेत की, सलमान खानच्या विरोधात जारी करण्यात आलेला १० हजार रुपयांचा वॉरंट जारी केला जावा आणि ६ फेब्रुवारीला त्याची उपस्थिती सुनिश्चित केली जावी.

न्यायालयाने आपल्या टिप्पणीत म्हटलं आहे की, "खोटे दावे करून किंवा ग्राहकांना फसवून जाहिरात करणे हा कायदेशीर गुन्हा आहे. सेलिब्रिटींनी जाहिरात करताना त्यातील दाव्यांची सत्यता तपासणे गरजेचे आहे." आदेशाची वारंवार अवहेलना करणाऱ्या कंपन्या आणि ब्रँड अँम्बेसेडर्सना या कारवाईतून एक मोठा इशारा देण्यात आला आहे.

आता सर्वांच्या नजरा ६ फेब्रुवारीकडे लागल्या आहेत. सलमान खान स्वतः न्यायालयात हजर राहतो की त्याचे वकील काही कायदेशीर पळवाट शोधतात, हे पाहणे महत्त्वाचे ठरेल.