Weather Alert: मराठवाड्यात पुन्हा हवापालट, ताशी 40 किमीने वारे वाहणार, धो धो कोसळणार, 5 जिल्ह्यांना अलर्ट

महाराष्ट्रातील हवामानात पुन्हा मोठे बदल जाणवत असून कोकणासह मराठवाड्यात देखील पाऊस परतला आहे. आज मराठवाड्यातील काही भागात वादळी वाऱ्यांसह जोरदार पावसाची शक्यता असून हवामान विभागाने 5 जिल्ह्यांसाठी यलो अलर्ट जारी केला आहे. गुरुवाचा हवामान अंदाज जाणून घेऊ.

मराठवाड्यातील छत्रपती संभाजीनगरसह आठही जिल्ह्यांना बुधवारी वादळी पावसाचा यलो अलर्ट जारी करण्यात आला होता. आज पुन्हा या भागात जोरदार पावसाची शक्यता असून छत्रपती संभाजीनगरसह 5 जिल्ह्यांना यलो अलर्ट जारी करण्यात आला आहे. त्यामुळे शेतकरी व नागरिकांना योग्य ती खबरदारी घ्यावी लागेल.

हवामान विभागाने छत्रपती संभाजीनगरसह जालना, बीड, लातूर आणि धाराशिव या 5 जिल्ह्यांत आज पावसाची शक्यता वर्तवली आहे. या जिल्ह्यांमध्ये ताशी 30 ते 40 किलोमीटर प्रती तास वेगाने वारे वाहतील. तसेच विजांसह जोरदार पाऊस होईल.

दुसरीकडे मराठवाड्यातील परभणी, हिंगोली आणि नांदेड जिल्ह्यांना आज कोणताही महत्त्वाचा अलर्ट देण्यात आलेला नाही. परंतु, याठिकाणी विजांसह हलका ते मध्यम पावसाची शक्यता आहे. पुढील काही दिवस हीच स्थिती कायम राहील.

मराठवाड्यात धुमाकूळ घालणाऱ्या पावसाने यंदा गेल्या काही दिवसांत उघडीप घेतली होती. परंतु, 2-3 दिवसांपासून पुन्हा पाऊस परतला आहे. पुढील 24 तास ही स्थिती कायम राहणार असून त्यानंतर मात्र पुन्हा पाऊस ओसरणार आहे. शुक्रवारपासून पुढील 3 दिवस कोणत्याही जिल्ह्याला महत्त्वाचा इशारा नाही.