Marathwada Rain: विजांचा कडकडाट होणार, छ. संभाजीनगरसह या जिल्ह्याला झोडपणार, 24 तासांसाठी अलर्ट

राज्यात गेल्या काही दिवसांत असणारा मान्सूनचा जोर 2 दिवसांत ओसरला आहे. मराठवाड्यात देखील पावासाची तीव्रता घटली आहे. छत्रपती संभाजीनगर आणि जालना जिल्ह्यांना आज पुन्हा पावसाची शक्यता असून हवामान विभागाने यलो अलर्ट जारी केला आहे. पुढील 24 तासांचा हवामान अंदाज जाणून घेऊ.

मराठवाड्यातील हवामानात मोठे बदल जाणवत आहेत. छत्रपती संभाजीनगर आणि जालना जिल्ह्यांत आज विजांच्या कडकाडाटासह हलक्या ते मध्यम पावसाची शक्यता आहे. या काळात ताशी 30 ते 40 किलोमीटर वेगाने वारे वाहतील.

छत्रपती संभाजीनगर आणि जालना वगळता उर्वरित मराठवाड्यात तुरळक हलक्या पावसाचा अंदाज आहे. परभणी, बीड, हिंगोली, नांदेड, लातूर आणि धाराशिव या सहा जिल्ह्यांना कोणताही सतर्कतेचा अलर्ट दिलेला नाही. मात्र या जिल्ह्यांत ढगांच्या गडगडाटासह हलक्या पावसाची शक्यता हवामान विभागाने वर्तवली आहे.

जालना आणि परभणीमधील काही भागात शुक्रवारी पावसाने हजेरी लावली. विजांचा कडकडाट आणि सोसाट्याच्या वाऱ्यासह आलेल्या पावसाने नागरिकांची तारांबळ उडाली. आज पुन्हा जालन्यात पावसाचा इशारा देण्यात आला असून परभणीला कोणताही अलर्ट नाही.

दरम्यान, मराठवाड्यात पुढील 24 तासांत पुन्हा हवापालट होणार आहे. पुढील काही दिवस मान्सूनची तीव्रता कमी होणार असून हवामान विभागाने कोणताही सतर्कतेचा अलर्ट दिलेला नाही. त्यामुळे शेतकऱ्यांना चांगल्या पावसाची वाट पाहावी लागणार आहे.