Rain Alert: विजांचा कडकडाट होणार, बीड, लातूरला अवकाळी झोडपणार, आजचा हवामान अंदाज

राज्यात मान्सूनपूर्वीच अवकाळी पावासने जोरदार हजेरी लावली आहे. आज मराठवाड्यासह राज्यातील बहुतांश भागात वादळी पावसाचा यलो अलर्ट देण्यात आला आहे. पुढील 24 तासांत बीड, लातूरसह धाराशिव परिसरात वादळी वाऱ्यांसह जोरदार पावसाचा अंदाज हवामान विभागाने वर्तवला आहे.

मराठवाड्यातील काही भागात बुधवारी वादळी वाऱ्यांसह पावसाने हजेरी लावली. गेल्या 24 तासांसाठी छत्रपती संभाजीनगरसह बीड, लातूर आणि धाराशिवला वादळी पावसाचा यलो अलर्ट देण्यात आला होता. तर आज पुन्हा याच भागात पावसाची शक्यता असून विजांच्या कडकडाटात पावसाचा अंदाज आहे.

बीड, लातूरसह धाराशिव जिल्ह्यांमध्ये आज विजांचा कडकडाट होऊन वादळी वाऱ्यांसह पावसाची शक्यता हवामान विभागाने वर्तवली आहे. या काळात ताशी 40 ते 50 किमी वेगाने वारे वाहतील. त्यामुळे नागरिकांना योग्य ती काळजी घ्यावी लागेल.

आज, 15 रोजी मराठवाड्यातील छत्रपती संभाजीनगर, जालना, परभणी, हिंगोली आणि नांदेड या 5 जिल्ह्यांत हवामान ढगाळ राहील. या ठिकाणी पावसाचा कोणताही अलर्ट देण्यात आलेला नाही. परंतु, तुरळक ठिकाणी ढगांच्या गडगडाटात हलक्या पावसाचा अंदाज हवामान विभागाने वर्तवला आहे.

दरम्यान, मराठवाड्यात वादळी पाऊस आणि गारपिटीमुळे शेतीचे नुकसान झाले आहे. आज पुन्हा पावसाचा इशारा देण्यात आला असून पुढील काही दिवस हवामानाची हीच स्थिती कायम राहणार आहे. त्यामुळे शेतकरी आणि नागरिकांना योग्य ती काळजी घ्यावी लागेल.