Latur Loksabha : महाराष्ट्रातलं असं मतदान केंद्र, जिथे एकही मतदार फिरकला नाही, काय आहे कारण?

आज राज्यात लोकसभेच्या 11 जागांसाठी मतदान होत आहे. यात लातूर लोकसभेचाही समावेश आहे. मात्र, लातूर जिल्ह्यातील एका गावात सकाळपासून दुपारपर्यंत एकही मतदान झालं नाही.

लातूर जिल्ह्यातल्या अहमदपूर तालुक्यातील सुनेगाव सांगवी येथील गावकऱ्यांनी मतदानावर सामूहिक बहिष्कार टाकला आहे.

मतदान केंद्र क्र-44 सुनेगावं सांगवी येथील पुरुष-256 व स्त्री-221 अशा एकूण 477 मतदारांनी लातूर नांदेड हायवेवर कट पॉईंट मिळण्यासाठी लोकसभा निवडणूक मतदानावर सामूहिक बहिष्कार टाकला आहे.

लातूर नांदेड हायवेवर असलेल्या गावामुळे गावकऱ्यांना पाच किलोमीटरचा वळण रस्ता घेत प्रवास करावा लागतोय. यामुळे सकाळी सात वाजल्यापासून अद्याप एकही मतदान या केंद्रावर झाले नाही.

जोपर्यंत आमच्या मागण्या मान्य होत नाहीत तोपर्यंत मतदान करणार नसल्याचा पवित्रा येथील नागरिकांनी घेतला आहे.