एक्सप्रेस वेवर भीषण अपघात, मुंबईकडे जाणाऱ्या लेनवर तीन किलोमीटर पर्यंत वाहनांच्या रांगा

अनिस शेख, प्रतिनिधी, लोणावळा (पुणे) : यशवंतराव चव्हाण द्रुतगती महामार्गावर (मुंबई-पुणे एक्सप्रेसवे) भीषण अपघात झाला आहे.

मुंबई पुणे एक्सप्रेस वेवर अमृतांजन पुलाजवळ हा अपघात झाला. पुण्याहून मुंबईकडे लोखंडी प्लेट घेऊन जाणारा ट्रक पलटला.

महामार्ग पोलीस अवजड क्रेनच्या सहाय्याने अपघातग्रस्त ट्रक बाजूला करण्याच्या प्रयत्नात आहेत. गेल्या तास सव्वा तासापासून ट्रक बाजूला करण्याचे त्यांचे काम सुरू आहे.

अपघातामुळे मुंबईकडे जाणाऱ्या लेनवर तीन किलोमीटर पर्यंत वाहतूक कोंडी झाली आहे.

रविवारी सुट्टीच्या दिवशी मुंबई पुणे एक्सप्रेस वेवर वाहतूक जास्तीची असते. नागरिक लोणावळा-खंडाळ्यात पर्यटनासाठी येत असतात. मात्र महामार्गावरील गर्दीच्या दिवशीच अपघात झाल्याने अनेक लोक वाहतूक कोंडीत अडकून पडले.