Washim : 60 कुटुंबांविरोधात घातपाताचा कट? विहिरीत मिसळलं विषारी द्रव्य, वाशिमच्या गावात घबराट

वाशिम तालुक्यातल्या एका गावामध्ये धक्कादायक प्रकार समोर आला आहे. या प्रकारामुळे गावातल्या 50-60 कुटुंबांविरोधात घातपाताचा कट तर नव्हता ना? असा संशय व्यक्त केला जात आहे.

वाशिम तालुक्यातील एकबुर्जी गावातील 50 ते 60 कुटुंबांना खासगी नळ योजनेद्वारे पाणीपुरवठा होतो. पाणीपुरवठा करणाऱ्या विहिरीत अज्ञात इसमाने 10 ते 15 लिटर विषारी द्रव्य टाकल्याचा धक्कादायक प्रकार उघडकीस आला.

पाणीपुरवठा करणाऱ्या विहिरीत विषारी द्रव्य टाकल्यामुळे पाण्याचा रंगही बदलला. सर्व कुटुंबांना पाणी पुरवठा करण्याआगोदर हा गंभीर प्रकार लक्षात आल्याने गावातील पाणीपुरवठा थांबवण्यात आला, त्यामुळे मोठी दुर्घटना टळली.

विहिरीत विषारी द्रव्य मिसळल्याचं कळताच एकबुर्जी परिसरातील शेतात पोलीस पथक आणि शासकीय अधिकारी दाखल झाले आहेत. विहिरीतील पाण्याचा पंचनामा करून गुन्हा दाखल करण्याची प्रक्रिया सुरू झाली आहे.