Pune Rain: पुण्यात तुफान आलंय! 3 तासांच्या पावसाने हाहाकार, 7 ठिकाणाचे भयानक PHOTOS

पुण्यात मागील काही दिवसांपासून वादळी पावसाने जोर धरला आहे. शहराच्या विविध भागांत सतत पावसाची नोंद होत असून त्यामुळे जनजीवनावर परिणाम झाला आहे. आज 3 तास झालेल्या पावसामुळे काही ठिकाणी मोठे नुकसान झालं आहे.

सनसवाडी पुणे-नगर महामार्गावर वादळी वाऱ्यासह आलेल्या पावसामुळे एक मोठं होर्डिंग कोसळलं. या होर्डिंगखाली सात ते आठ दुचाकी सापडल्या. सुदैवाने या घटनेत कुठलीही जीवितहानी झाली नाही.

याशिवाय, धानोरी परिसरात पोरवाल रोडवर देखील एक बॅनर कोसळल्याची घटना समोर आली आहे. पावसाचा परिणाम केवळ शहरातच नव्हे तर पुणे विमानतळावरही पाहायला मिळाला.

विमानतळाच्या टर्मिनलमध्ये पावसाचं पाणी गळाल्याचं पाहिला मिळत आहे. याचबरोबर विमानतळाच्या परिसरात ड्रेनेजमधील पाणी देखील रस्त्यावर आल्याने प्रवाशांना अडचणींचा सामना करावा लागला.

फुरसुंगी रोडवरही एक बॅनर कोसळल्याची घटना घडली आहे. अवघ्या तासभराच्या पावसानंतर शहरातील तीन वेगवेगळ्या ठिकाणी होर्डिंग कोसळले. सुदैवाने कोणतीही जखमीची नोंद झाली नाही.

कोथरूडमध्ये जोरदार पाऊस झाल्यामुळे तळ्याचे स्वरूप पाहिला मिळालं. यामुळे नागरिकांना अडचणींचा सामना करावा लागला आहेत.

दरम्यान, हवामान विभागाने पुणे जिल्ह्यासाठी पुढील काही दिवसांसाठी ऑरेंज अलर्ट जारी केला आहे. त्यामुळे नागरिकांना आवश्यक ती काळजी घेण्याचं आवाहन प्रशासनाकडून करण्यात आलं आहे. प्री-मान्सून पावसामुळे शहरात पावसाळ्यापूर्वी ची कामे आणि सुरक्षेच्या दृष्टीने उपाययोजना करण्याची गरज निर्माण झाली आहे.