Weather Alert: बाप्पा गेले अन् वारं फिरलं, सोमवारी हवामानात मोठे बदल, कुठं कोसळणार पाऊस?

गणेशोत्सवाच्या काळात राज्यात पावसाचा जोर होता. नुकतेच गणेश विसर्जन झाले असून हवामानात मोठे बदल जाणवत आहेत. उत्तर महाराष्ट्रासह उत्तर कोकण आणि मराठवाड्यातील काही भागात पावसाची शक्यता आहे. तर विदर्भातील काही जिल्ह्यांत जोरदार पावसाचा अंदाज हवामान विभागाने वर्तवला आहे. सोमवारी, 8 सप्टेंबर रोजी हवामान आणि पावसाची स्थिती कशी राहील? जाणून घेऊ.

कोकणासह मुंबईतील हवामानात मोठे बदल जाणवत आहेत. गेल्या काही काळापासून धुमाकूळ घालणाऱ्या पावसाचा जोर ओसरणार आहे. सोमवारी मुंबई शहर आणि उपनगरात पुढील 24 तासांत मध्यम पावसाची शक्यता आहे. त्याचबरोबर रायगड, ठाणे आणि पालघर जिल्ह्यात देखील हवामान विभागाने मध्यम पावसाचा अंदाज वर्तवला आहे. पुढील 24 तासांसाठी कोणताही सतर्कतेचा इशारा नाही.

उत्तर महाराष्ट्रात सप्टेंबरच्या पहिल्या आठवड्यात पावसाचा जोर होता. आता मात्र पावसाची तीव्रता कमी होणार आहे. 8 सप्टेंबरला कोणत्याही जिल्ह्याला सतर्कतेचा इशारा नाही. परंतु, काही ठिकाणी हलक्या ते मध्यम पावसाची शक्यता वर्तवण्यात आली आहे.

पश्चिम महाराष्ट्रातील पावसाने विश्रांती घेतली आहे. पुढील काही दिवस पुणे, सातारा, सांगली, सोलापूर आणि कोल्हापूर मध्ये सामान्यतः ढगाळ हवामान राहण्याची शक्यता आहे. परंतु, हवामान विभागाने पावसाचा कोणताही महत्त्वाचा इशारा दिलेला नाही.

मराठवाड्यात हवा बदलली असून पावसाने उघडीप घेतली आहे. छत्रपती संभाजीनगरसह 8 जिल्ह्यांत सोमवारी मोठ्या पावसाची शक्यता नाही. त्यानंतर मात्र हवामानात पुन्हा बदल होणार असून काही जिल्ह्यांत जोरदार पावसाचा अंदाज आहे.

राज्यातील बहुतांश भागातून पावसाने उघडीप घेतली आहे. परंतु, पूर्व विदर्भात मात्र पावसाचा जोर कायम आहे. पूर्व विदर्भातील वर्धा, नागरपूर, चंद्रपूर, भंडारा, गोंदिया आणि गडचिरोली या जिल्ह्यांना सोमवारी पावसाचा यलो अलर्ट देण्यात आला आहे. या काळात विजा आणि ढगांच्या गडगडाटासह जोरदार पाऊस होईल.

दरम्यान, संपूर्ण राज्यातून सोमवारी पावसाचा जोर ओसरणार असल्याचे चित्र आहे. पूर्व विदर्भातील सहा जिल्हे वगळता उर्वरित महाराष्ट्रात कुठेही पावसाचा अलर्ट नाही. मात्र, 9 सप्टेंबरला काही भागात पाऊस पुन्हा सक्रीय होण्याची चिन्हे आहेत.