Weather Alert: महाराष्ट्रात पुन्हा वारं फिरलं, 25 जिल्ह्यांना महत्त्वाचा अलर्ट

राज्यातील काही भागांत पुन्हा एकदा पाऊस सक्रिय झाला आहे. 3 सप्टेंबर रोजी राज्यातील कोकण, घाटमाथा परिसर, मराठवाडा आणि विदर्भातील काही जिल्ह्यांत मुसळधार ते अति मुसळधार पावसाची शक्यता हवामान विभागाकडून वर्तविण्यात आली आहे. राज्यातील 25 जिल्ह्यांना यलो तर 8 जिल्ह्यांना ऑरेंज अलर्ट जारी करण्यात आला आहे. पुढील 4 दिवस राज्यात मुसळधार पाऊस कायम राहण्याची शक्यता वर्तवण्यात आली आहे. 3 सप्टेंबर रोजी राज्यात हवामानाची स्थिती कशी राहील पाहुयात.

कोकण विभागातील पालघर आणि ठाणे जिल्ह्यांत वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. तर मुंबईत मुसळधार पावसाची शक्यता असल्याचं हवामान विभागानं सांगितलंय. पालघर, ठाणे, मुंबई या तीन जिल्ह्यांना पावसाचा यलो अलर्ट जारी करण्यात आला आहे. तसेच रायगड, रत्नागिरी, सिंधुदुर्ग या जिल्ह्यांत मुसळधार ते अति मुसळधार पावसाची शक्यता असल्याने पावसाचा ऑरेंज अलर्ट जारी करण्यात आला आहे.

पश्चिम महाराष्ट्रातील पुण्यात वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. पुण्यात पावसाचा यलो अलर्ट जारी करण्यात आला आहे. कोल्हापूर, सातारा, सांगली, सोलापूर या जिल्ह्यांत मध्यम स्वरूपाच्या पावसाची शक्यता असल्याचं हवामान विभागाकडून सांगण्यात आलं आहे. पुणे, कोल्हापूर, सातारा घाटमाथा परिसरात मुसळधार ते अति मुसळधार पावसाचा इशारा देण्यात आला आहे. याठिकाणी पावसाचा ऑरेंज अलर्ट जारी करण्यात आला आहे.

मराठवाड्यातील छत्रपती संभाजीनगर, जालना, परभणी, बीड, हिंगोली, नांदेड या जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता वर्तवण्यात आली आहे. या जिल्ह्यांना पावसाचा यलो अलर्ट देण्यात आला आहे. तर लातूर आणि धाराशिव या दोन जिल्ह्यांत हलक्या ते मध्यम स्वरूपाच्या पावसाची शक्यता असल्याचं हवामान विभागाकडून सांगण्यात आलं आहे.

उत्तर महाराष्ट्रातील धुळे, नंदुरबार, नाशिक, अहिल्यानगर जिल्ह्यांत विजांच्या कडकडाटासह आणि वादळी वाऱ्यासह पावसाचा इशारा देण्यात आला आहे. या जिल्ह्यांना पावसाचा यलो अलर्ट जारी करण्यात आला आहे. नाशिक घाटमाथा परिसरात मुसळधार पावसाची शक्यता असल्याने पावसाचा यलो अलर्ट देण्यात आला आहे. तसेच जळगाव जिल्ह्यांत मुसळधार ते अति मुसळधार पावसाची शक्यता असल्याने पावसाचा ऑरेंज अलर्ट जारी करण्यात आला आहे.

विदर्भातील अकोला, भंडारा, चंद्रपूर, गडचिरोली, नागपूर आणि वर्धा जिल्ह्यात वादळी वाऱ्यासह आणि विजांच्या कडकडाटासह मुसळधार पावसाची शक्यता वर्तवण्यात आली आहे. तसेच बुलढाणा, गोंदिया, वाशिम आणि यवतमाळ जिल्ह्यात वादळी वाऱ्यासह आणि विजांच्या कडकडाटासह पावसाची शक्यता वर्तवण्यात आली आहे. या सर्वच जिल्ह्यांना पावसाचा यलो अलर्ट जारी करण्यात आला आहे. तर अमरावतीत मुसळधार ते अति मुसळधार पावसाची शक्यता असल्याने ऑरेंज अलर्ट जारी करण्यात आला आहे.

3 सप्टेंबर रोजी राज्यात मुसळधार ते अति मुसळधार पावसाची शक्यता वर्तवण्यात आली आहे. 25 जिल्ह्यांना यलो अलर्ट जारी करण्यात आला आहे. त्यामुळे नागरिकांनी आवश्यक ती काळजी घेणे गरजेचे आहे.