Weather Alert : महाराष्ट्रात आता येणार उष्णतेची लाट, सगळ्यात जास्त तापणार हा जिल्हा, हवामान विभागाचा इशारा

महाराष्ट्रात उष्णतेचा पारा दिवसेंदिवस वाढत असल्याचे पाहायला मिळत आहे. 3 मार्च धुलिवंदनच्या रोजी उष्ण आणि कोरडे हवामान कायम राहण्याचा अंदाज आहे. राज्यात कमाल तापमानात 3 ते 4 अंशांची वाढ होण्याची शक्यता हवामान खात्याने वर्तवली आहे. पुढील काही दिवसांत तापमान आणखी वाढेल. त्यामुळे नागरिकांनी सावधगिरी बाळगावी.

कोकण विभागातील मुंबई, ठाणे, रायगड, रत्नागिरी, सिंधुदुर्गमध्ये दमट आणि उष्ण हवामान राहील. मुंबईत कमाल 29-32 अंश सेल्सिअस, किमान 24-26 अंश राहण्याची शक्यता हवामान खात्याने वर्तवली आहे. आर्द्रता जास्त असल्याने उकाडा तीव्र जाणवेल.

पश्चिम महाराष्ट्रातील पुणे, सातारा, सांगली, कोल्हापूरमध्ये कोरडे आणि उष्ण हवामान राहील. पुण्यात कमाल 31-34 अंश, किमान 16-19 अंश राहील.

उत्तर महाराष्ट्रातील नाशिक, धुळे, जळगाव, नंदुरबारमध्ये तापमान वाढ होईल. नाशिकमध्ये दिवसा 34-35 अंश, रात्री 18-21 अंश तापमान राहील.

मराठवाड्यातील छत्रपती संभाजीनगर, जालना, बीड, लातूर, नांदेड, परभणी, धाराशिवमध्ये उष्ण आणि कोरडे हवामान राहील. कमाल 33-36 अंशांपर्यंत, किमान 19-22 अंश राहील.

विदर्भातील नागपूर, अमरावती, अकोला, वाशिम, यवतमाळ, चंद्रपूर, गडचिरोली, बुलढाणामध्ये सर्वाधिक उष्णता जाणवेल. कमाल 34-37 अंश, किमान 20-23 अंश राहील.

एकंदरीत, महाराष्ट्रात तापमानात हळूहळू वाढ होत आहे. पुढील काही दिवसांत तापमानात मोठी वाढ होणार असल्याने नागरिकांना काळजी घ्यावी लागेल.