बाप्पांच्या विसर्जनाला वरुणराजाची हजेरी! पश्चिम महाराष्ट्रात काय असणार पावसाची स्थिती?

गेल्या काही दिवसांपासून राज्यात पावसाने काहीशी विश्रांती घेतली आहे. आज गणेश विसर्जनाच्या दिवशी काही ठिकाणी हलक्या ते मध्यम स्वरुपाचा पाऊस हजेरी लावण्याची शक्यता आहे. पश्चिम महाराष्ट्रातही तुरळक ठिकाणी अंदाज हवामान विभागाने वर्तवला आहे.

पुणे व आजूबाजूच्या परिसरात आकाश ढगाळ राहणार आहे. तर अधून मधून पावसाची शक्यता आहे. पुण्यातील घाट विभागात काही तुरळक ठिकाणी हलका ते मध्यम स्वरूपाच्या पावसाचा अंदाज आहे. आज पुण्यात 25 अंश कमाल तर 20 अंश सेल्सिअस किमान तापमान असेल.

सातारा जिल्ह्यातील अनेक भागात आज पावसाची शक्यता आहे. पश्चिमेकडील पाटण, महाबळेश्वर, जावळी, सातारा, कऱ्हाड, वाई तालुक्यांत अनेक ठिकाणी जोरदार पावासाचा अंदाज हवामान विभागाने वर्तवला आहे. साताऱ्यात आज 28 अंश कमाल तर 23 अंश सेल्सिअस किमान तापमान असेल.

सांगली जिल्ह्यात पावसाची उघडझाप सुरू आहे. अधूनमधून मोठ्या सरी येत आहेत. मात्र आजपासून पावसाचा जोर वाढण्याची शक्यता आहे. सांगली जिल्ह्यात आज 27 अंश कमाल तर 20 अंश सेल्सिअस किमान तापमान असेल.

कोल्हापूर, इचलकरंजीसह जिल्ह्याच्या अनेक भागात आज सायंकाळी पाऊस हजेरी लावणार आहे. तर काही भागात वादळी वारा, विजेच्या कडकडाटासह पावसाची शक्यता आहे. कोल्हापूर मध्ये आज 26 अंश कमाल तर 22 अंश सेल्सिअस किमान तापमान असेल.

सोलापूर शहर व जिल्ह्यात आज चांगला पाऊस होईल. करमाळा, पंढरपूर, मोहोळ, माढा, सांगोला तालुक्यांमध्ये पावसाचा जोर वाढेल, असा अंदाज हवामान विभागाने वर्तवला आहे. सोलापूर मध्ये आज 25 अंश कमाल तर 20 अंश सेल्सिअस किमान तापमान असेल.