साताऱ्यात वादळी पावसाची शक्यता, पुण्यासह पश्चिम महाराष्ट्रात काय असेल स्थिती?

गेल्या काही दिवसांत राज्यात जोर काहीसा कमी झाला आहे. पश्चिम महाराष्ट्रातही काहीशी तशीच स्थिती असून घाटमाथ्याच्या भागात काही प्रमाणात पाऊस होतोय. आज, शनिवारी पश्चिम महाराष्ट्रातील काही जिल्ह्यांत यलो अलर्ट जारी करण्यात आला असून पावसाची शक्यता आहे.

पुणे शहरासह परिसरात दिवसभर ढगाळ वातावरण राहिल. पुणे जिल्ह्यातील हवेली, पुणे शहर, मावळ, मुळशी, शिरूर, बारामती, इंदापूर, दौंड, भोर, वेल्हा, पुरंदर, खेड, जुन्नर, आंबेगाव या ठिकाणी मध्यम ते अतिमध्यम पावसाची शक्यता वर्तवण्यात आली आहे. पुण्यात आज 27 अंश कमाल तर 21 अंश सेल्सिअस किमान तापमान असेल.

सातारा शहरात सायंकाळी जोरदार वाऱ्यासह विजांच्या कडकडाट आणि ढगांच्या गडगडाटात मुसळधार पाऊस पडण्याची शक्यता आहे. कोरेगाव, खटाव, कराड, पाटण, वाई, जावली, महाबळेश्वर, खंडाळा, फलटण आणि माण या तालुक्यात तुफान पावसाची शक्यता वर्तवण्यात येत आहे. साताऱ्यात 26 अंश कमाल तर 21 अंश सेल्सिअस किमान तापमान असेल.

कोल्हापूर जिल्ह्यात आज काही प्रमाणात पाऊस कोसळेल. तर काही ठिकाणी उन्ह पडण्याची शक्यता वर्तवण्यात येत आहे. कोल्हापूरमधील करवीर, इचलकरंजी ,गडहिंगलज, राधानगरी या भागात पावसाची शक्यता वर्तवण्यात येत आहे. आज कोल्हापूर मध्ये 26 अंश कमाल तर 20 अंश सेल्सिअस किमान तापमान असेल.

विश्रांतीनंतर सांगलीसह जिल्ह्यात पुन्हा एकदा दमदार पावसाला सुरुवात झाली. सांगली शहरात विजांच्या कडकडाटासह पाऊस होत होता. आता जिल्ह्यातील काही भागातही पावसाने जोर धरला आहे. आजही सांगलीत पावसाची शक्यता वर्तवण्यात आलीये. सांगलीत 23 अंश कमाल तर 17 अंश सेल्सिअस किमान तापमान असेल.

सोलापूर शहर व जिल्ह्यात आज दमदार पावसाची शक्यता आहे. करमाळा, पंढरपूर, मोहोळ, माढा, सांगोला आदी तालुक्यांमध्ये पावसाचा जोर वाढेल असं सांगण्यात येतंय. सोलापूर मध्ये 23 अंश कमाल तर 19 अंश सेल्सिअस किमान तापमान असेल. दरम्यान, पश्चिम महाराष्ट्रात पावसाचा जोर वाढणार असून काही ठिकाणी समाधानकारक पावसाची शक्यता आहे.