Weather Alert: 48 तास धोक्याचे! पश्चिम महाराष्ट्रात वारं फिरलं, पुणे ते कोल्हापूर हायअलर्ट

बंगालच्या उपसागरातील कमी दाब क्षेत्रामुळे राज्यात पावसाचा जोर वाढण्यास पोषक हवामान झाले आहे. आज 3 सप्टेंबर रोजी कोकण, घाटमाथ्यावर जोरदार पावसाची शक्‍यता असल्याने दक्षतेचा ऑरेंज अलर्ट देण्यात आला आहे. उर्वरित राज्यात काही ठिकाणी विजांसह जोरदार सरींची शक्यता असल्याने सतर्कतेचा इशारा हवामान विभागाने दिला आहे.

पुणे जिल्ह्यातील शिवाजीनगर परिसरात मागील 24 तासात 0.3 मिलिमीटर पावसाची नोंद झाली. पुढील 24 तासात पुणे जिल्ह्यात विजांसह पावसाची शक्‍यता असल्याने दक्षतेचा यलो अलर्ट देण्यात आला आहे. तसेच पुण्याच्या घाटमाथ्यावर जोरदार पावसाचा अंदाज असल्याचे ऑरेंज अलर्ट देण्यात आला आहे. यावेळी कमाल तापमान 27 तर किमान तापमान 22 अंश सेल्सिअस इतके राहील.

सातारा जिल्ह्यात मागील 24 तासात 3 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 25.6 अंश सेल्सिअस राहिल. तसेच सातारा घाटमाथ्यावर जोरदार पावसाची शक्यता असल्याने हवामान विभागाने दक्षतेचा ऑरेंज अलर्ट जारी केला आहे. उर्वरित सातारा जिल्ह्यात मध्यम पावसाची शक्यता आहे.

कोल्हापूर जिल्ह्यात मागील 24 तासात 5 मिलीमीटर पावसाची नोंद झाली. यावेळी कमाल तापमान 23.7 अंश सेल्सिअस राहिले. पुढील 24 तासात कमाल तापमान 27 अंशावर राहिल. घाटमाथ्यावर जोरदार पावसाची शक्यता असल्याने हवामान विभागाने ऑरेंज अलर्ट दिला आहे. उर्वरित कोल्हापूर जिल्ह्यात मध्यम पावसाची शक्‍यता आहे.

मंगळवारी सांगली जिल्ह्यामध्ये 1 मिलिमीटर पावसाची नोंद झाली. तसेच कमाल तापमानात घट होवून 26.8 अंश सेल्सिअस तापमानाची नोंद झाली. पुढील 24 तासात मध्यम पावसाची शक्यता आहे. यावेळी जिल्ह्यातील कमाल तापमान 29 तर कमान तापमान 20 अंश सेल्सिअस इतके राहील.

सोलापूर जिल्हात मागील 24 तासात 12 मिलीमीटर पावसाची नोंद झाली. तर 30.7 अंश सेल्सिअस कमाल तापमानाची नोंद झाली. आज कमाल तापमान 30 अंशावर राहणार असून सोलापूर जिल्ह्यात मध्यम पावसाची शक्यता वर्तवण्यात आली आहे.

कोकण, घाटमाथ्यावर पावसाचा जोर वाढण्याची शक्यता आहे. पुणे, कोल्हापूर, सातारा घाटमाथ्यावर मुसळधार पावसाची शक्यता असल्याने दक्षतेचा इशारा देण्यात आला आहे. सप्टेंबरच्या पहिल्याच आठवड्यात पावसाने पुन्हा जोर धरला आहे. तर काही ठिकाणी पावसाच्या सरींसह भाद्रपदाचे ऊन चटका वाढवत आहे.