तो पुन्हा आलाय! पश्चिम महाराष्ट्रात धो धो, तुमच्या जिल्ह्यात पावसाची काय स्थिती?

गेल्या काही दिवसांपासून राज्यात परतीच्या जोर पुन्हा वाढला आहे. विदर्भ, मराठवाड्यासह पश्चिम महाराष्ट्रात देखील जोरदार पाऊस होतोय. आज पुन्हा पश्चिम महाराष्ट्रातील जिल्ह्यांना हवामान विभागाने पावसाचा इशारा दिला आहे.

पुणे व आजू बाजूच्या परिसरात आकाश ढगाळ राहणार आहे. तर अधून मधून पावसाची शक्यता आहे. पुण्यातील घाट विभागात काही तुरळक ठिकाणी हलका ते मध्यम स्वरूपाच्या पावसाची शक्यता आहे. आज पुण्यात 27 अंश कमाल तर 21 अंश सेल्सिअस किमान तापमान असेल.

सातारा जिल्ह्यातील अनेक भागात आज पावसाची शक्यता वर्तवण्यात आली आहे. पश्चिमेकडील पाटण, महाबळेश्वर, जावळी, सातारा, कऱ्हाड, वाई तालुक्यांत अनेक ठिकाणी हलक्या सरी कोसळण्याची शक्यता आहे. साताऱ्यात आज 29 अंश कमाल, तर 24 अंश सेल्सिअस किमान तापमान असेल.

सांगली जिल्ह्यात पावसाची उघडझाप सुरू असून अधूनमधून मोठ्या सरी येत आहेत. मात्र पावसाचा जोर वाढण्याची शक्यता आहे. सांगली जिल्ह्यात आज 27 अंश कमाल तर 22 अंश सेल्सिअस किमान तापमान असेल.

कोल्हापूर, इचलकरंजीसह जिल्ह्याच्या अनेक भागात पाऊस हजेरी लावणार आहे. कोल्हापूर मध्ये आज 26 अंश कमाल तर 22 अंश सेल्सिअस किमान तापमान असेल.

सोलापूर शहर व जिल्ह्यात चांगला पाऊस होईल. करमाळा, पंढरपूर, मोहोळ, माढा, सांगोला आदी तालुक्यांमध्ये पावसाची शक्यता आहे. सोलापूरमध्ये आज 26 अंश कमाल तर 22 अंश सेल्सिअस किमान तापमान असेल.