जाता-जाता धुमाकूळ! पश्चिम महाराष्ट्रात पुन्हा जोरधार, हवामान विभागाचा इशारा

पुणे जिल्ह्यात तूरळक ठिकाणी वादळी वाऱ्यासह जोरदार पाऊस पडण्याची शक्यता आहे. तसेच शिरूर, मंचर, खेड या ठिकाणी देखील जोरदार पावसाचा इशारा हवामान विभागाने दिलाय. पुण्यात आज 28 अंश कमाल तर 21अंश सेल्सिअस किमान तापमान असेल.

सातारा जिल्ह्यातील काही भागात सायंकाळी विजांच्या कडकडाट आणि ढगांच्या गडगडाटात वादळी पावसाची शक्यता हवामान विभागाने वर्तवली आहे. साताऱ्यात 26 अंश कमाल तर 20 अंश सेल्सिअस किमान तापमान असेल.

सांगली जिल्ह्यात जोरदार पावसाला सुरुवात झाली आहे. त्यामुळे खरीप हंगामातील तूर, उडीद पिकांच्या काढणीला या पावसामुळे ब्रेक लागला आहे. मिरज, जत, तासगाव, शिराळा, आटपाडी, पलूस,कडेगाव या भागात आज जोरदार पावसाची शक्यता आहे. सांगली जिल्ह्यात 25 अंश कमाल तर 20 अंश सेल्सिअस किमान तापमान असेल.

कोल्हापूर शहरात गेल्या दोन दिवसांपासून पावसाचा जोर वाढला आहे. तसेच जिल्ह्यातील हातकणंगले, शिरोळ, करवीर, गगनबावडा, राधानगरी, कागल या तालुक्यात जोरदार पावसाची शक्यता आहे. कोल्हापूर मध्ये 27 अंश कमाल तर 22 अंश सेल्सिअस किमान तापमान असेल.

सोलापूर शहर तसेच ग्रामीण भागात आज दुपारी जोरदार पावसाची शक्यता वर्तवण्यात येत आहे. बार्शी, अक्कलकोट, पंढरपूर, मंगळवेढा, सांगोला, मोहोळ या तालुक्यात जोरदार पाऊस पडेल. आज सोलापूर मध्ये 25 अंश कमाल तर 20 अंश सेल्सिअस किमान तापमान असेल.