पश्चिम महाराष्ट्रात आज जोरधार, इथं पाहा तुमच्या जिल्ह्यातील पावसाचा अंदाज?

काही काळ विश्रांती घेतलेला पाऊस राज्यात पुन्हा सक्रीय झाला आहे. आज पश्चिम महाराष्ट्रातील जिल्ह्यांमध्ये जोरदार पावसाची शक्यता आहे. पुणे, कोल्हापूर, सातारा, सांगलीसह सोलापुरातील काही भागातही आज पावसाचा अंदाज वर्तवण्यात आला आहे.

पुणे व आजू बाजूच्या परिसरात आकाश ढगाळ राहणार आहे. तर अधून मधून पावसाची शक्यता आहे. पुण्यातील घाट विभागात काही तुरळक ठिकाणी हलका ते मध्यम स्वरूपाच्या पावसाची शक्यता आहे. आज पुण्यात 27 अंश कमाल तर 20 अंश सेल्सिअस किमान तापमान असेल.

सातारा जिल्ह्यातील अनेक भागात आज पावसाची शक्यता आहे. पश्चिमेकडील पाटण, महाबळेश्वर, जावळी, सातारा, कऱ्हाड, वाई तालुक्यांत जोरदार पाऊस होण्याची शक्यता आहे. साताऱ्यात आज 28 अंश कमाल तर 23 अंश सेल्सीअस किमान तापमान असेल.

सांगली जिल्ह्यात आज ऊन पावसाचा खेळ पाहायला मिळणार असून पावसाचा जोर वाढण्याची शक्यता आहे. सांगलीत आज 27 अंश कमाल तर 20 अंश सेल्सिअस किमान तापमान असेल.

कोल्हापूर, इचलकरंजीसह जिल्ह्याच्या अनेक भागात आज सायंकाळी पाऊस हजेरी लावणार आहे. तर काही भागात वादळी वारा, विजेच्या कडकडाटासह पावसाची शक्यता आहे. कोल्हापूर मध्ये आज 26 अंश कमाल तर 22 अंश सेल्सिअस किमान तापमान असेल.

सोलापूर शहर व जिल्ह्यात आज जोरदार पाऊस होईल. करमाळा, पंढरपूर, मोहोळ, माढा, सांगोला आदी तालुक्यांमध्ये पावसाचा जोर आज वाढेल, असा अंदाज हवामान विभागाने वर्तवला आहे. सोलापूरमध्ये आज 25 अंश कमाल तर 20 अंश सेल्सिअस किमान तापमान असेल.