पुढील 2 दिवस जोरधार! पश्चिम महाराष्ट्रात इथं पुन्हा बरसणार, पाहा पावसाचा अंदाज

राज्यात सर्वत्र ऑक्टोबर हिटचे चटके जाणवत आहेत. अशातच कमी-अधिक प्रमाणात परतीच्या जोरही कायम आहे. पश्चिम महाराष्ट्रात देखील पुढील 2 दिवस काही ठिकाणी जोरदार पावसाची शक्यता आहे.

पुणे जिल्ह्यात तुरळक ठिकाणी वादळी वाऱ्यासह जोरदार पाऊस पडण्याची शक्यता आहे. शिरूर, मंचर, खेड या ठिकाणी देखील जोरदार पावसाचा इशारा हवामान विभागाने दिलाय. पुण्यात आज 28 अंश कमाल तर 21अंश सेल्सिअस किमान तापमान असेल.

सातारा जिल्ह्यातील काही भागात सायंकाळी जोरदार वाऱ्यासह विजांचा कडकडाटात आणि ढगांच्या गडगडाटात मुसळधार पावसाची शक्यता आहे. साताऱ्यात 26 अंश कमाल तर 20 अंश सेल्सिअस किमान तापमान असेल.

सांगली जिल्ह्यात जोरदार पावसाला सुरुवात झाली आहे.त्यामुळे खरीप हंगामातील तूर, उडीद पिकांच्या काढणीला या पावसामुळे ब्रेक लागला आहे. मिरज, जत, तासगाव, शिराळा, आटपाडी, पलूस,कडेगाव या भागात जोरदार पावसाची शक्यता हवामान विभागाने वर्तवली आहे. सांगलीत 25 अंश कमाल तर 20 अंश सेल्सिअस किमान तापमान असेल.

कोल्हापूर जिल्ह्यातील हातकणंगले, शिरोळ, करवीर, गगनबावडा, राधानगरी, कागल या तालुक्यात जोरदार पावसाची शक्यता आहे. कोल्हापूरमध्ये आज 27 अंश कमाल तर 22 अंश सेल्सिअस किमान तापमान असेल.

सोलापूर शहर तसेच ग्रामीण भागात आज दुपारी जोरदार पावसाची शक्यता वर्तवण्यात येत आहे. बार्शी, अक्कलकोट, पंढरपूर, मंगळवेढा, सांगोला, मोहोळ या तालुक्यात जोरदार पाऊस पडेल. आज सोलापूर मध्ये 25 अंश कमाल तर 20 अंश सेल्सिअस किमान तापमान असेल.

राज्यात पावसाचा जोर काहीसा ओसरला असला तरी पश्चिम महाराष्ट्रातील जिल्ह्यांमध्ये काही ठिकाणी पाऊस होतोय. त्यातच उन्हाचा कडकाही वाढला आहे. अशात आज पुन्हा हवामान विभागाने पावसाचा इशारा दिल्याने नागरिकांना योग्य ती काळजी घ्यावी लागणार आहे.