पश्चिम महाराष्ट्रात थंडीचा जोर होणार थोडासा कमी, सोलापुरात ढगाळ वातावरण, पाहा आजचं हवामान अपडेट

पुणे शहरात थंडीची लाट आल्याची स्थिती आहे. बुधवारी 9 अंशांपर्यंत किमान तापमान घसरलं होतं. आज मात्र यामध्ये 2 अंशांनी वाढ होणार असून पुढील काही दिवसांत हळूहळू थंडीचा जोर कमी होईल, असा अंदाज आहे.

सोलापूर जिल्ह्यात 31 अंश सेल्सीअस कमाल तर 17 अंश सेल्सीअस किमान तापमान असेल. त्यामुळे थंडीचा कडाका थोडासा कमी होणार आहे. तर आज वातावरण हे बहुतांशी ढगाळ राहणार आहे.

सातारा जिल्ह्यात समिश्र वातावरण असून 29 अंश सेल्सीअस कमाल तर 14 अंश सेल्सीअस किमान तापमान असेल. आज 2 अंश सेल्सीअस किमान तापमानाची वाढ ही झाली आहे.

सांगली जिल्ह्यातील वातावरण आज सूर्यप्रकाशित राहणार असून 3 अंश सेल्सीअस किमान तापमान वाढलं आहे. पुढील काही दिवस असंच वातावरण राहणार आहे.

कोल्हापूरमध्ये सकाळी ढगाळ वातावरण तर दुपारी ऊन असण्याची शक्यता असून हवेतील गारवा कमी झाला आहे. 30 अंश सेल्सीअस कमाल तर 16 अंश सेल्सीअस किमान तापमान असेल.