रावणाला 'अहंकार' नडला, वरदानात सर्व काही मागितलं, पण 'त्या' एका चुकीने झाला वध

रामायण ही केवळ एक कथा नसून तो मानवी स्वभावाचा आणि कर्माचा आरसा आहे. यात लंकेश रावणाचे पात्र अत्यंत गुंतागुंतीचे आणि शिकवण देणारे आहे. रावण हा प्रकांड पंडित, दशग्रंथी ब्राह्मण आणि भगवान शिवशंकराचा परमभक्त होता.

मात्र, त्याच्या अफाट बुद्धिमत्तेला जेव्हा अहंकाराची जोड मिळाली, तेव्हा त्याच्या विनाशाची ठिणगी पडली. ब्रह्मदेवांकडून मिळालेल्या अमोघ वरदानाचा वापर करून रावणाने त्रैलोक्यावर विजय मिळवला, पण एका लहानशा चुकीने त्याचा अंत ओढवला.

ब्रह्मदेवांचे अमोघ वरदान: रावणाने कठोर तपश्चर्या करून भगवान ब्रह्मदेवांना प्रसन्न केले होते. त्याने वरदान मागितले की, "मला देव, दानव, गंधर्व, यक्ष, नाग किंवा कोणतीही दैवी शक्ती मारू शकणार नाही." या वरदानामुळे तो अजेय झाला आणि मृत्यूचे भय त्याच्या मनातून पूर्णपणे निघून गेले.

मनुष्याला मानले तुच्छ: वरदान मागताना रावणाने देवांना आणि दैत्यांना घाबरून त्यांचे नाव घेतले, पण 'मनुष्य' आणि 'वानर' जातीला त्याने अत्यंत तुच्छ मानले. त्याला वाटले की एक सामान्य मानव त्याचे काय वाकडे करू शकणार? याच अहंकारापोटी त्याने वरदानात मानवापासून संरक्षणाची मागणीच केली नाही.

अहंकार नडला आणि चूक घडली: रावणाने मानवाचा केलेला हा अपमानच त्याच्या वधाचे मुख्य कारण ठरला. सृष्टीच्या नियमानुसार, ज्याचा त्याने त्याग केला होता, त्याच रूपाने त्याचा अंत होणे निश्चित होते. त्यामुळेच भगवान विष्णूंनी 'राम' या मानवी रूपात अवतार घेतला, ज्याचा वध करण्यासाठी रावणाकडे कोणतेही सुरक्षा कवच नव्हते.

शक्तिशाली अस्त्रांचा गर्व: रावणाकडे अनेक दैवी अस्त्रे आणि शस्त्रे होती. त्याला वाटले की त्याच्या रथासमोर आणि मायावी शक्तीसमोर कोणीही टिकू शकणार नाही. मात्र, प्रभू श्रीरामांनी कोणत्याही मायावी शक्तीचा वापर न करता, केवळ सत्य आणि धर्माच्या जोरावर रावणाच्या अहंकाराचा फुगा फोडला.

विभीषणाचा सल्ला नाकारला: ज्ञानी असूनही रावण 'मोहा'त अडकला होता. त्याचा भाऊ विभीषण याने त्याला वारंवार समजावले की, राम हे सामान्य मनुष्य नसून साक्षात ईश्वराचा अंश आहेत. पण अहंकाराने अंध झालेल्या रावणाने आपल्याच भावाचा अपमान करून त्याला लंकेतून हाकलून दिले, जी त्याची दुसरी मोठी चूक ठरली. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)