Team India : वनडेमध्ये पराभव झाला तर... गंभीर जबाबदार नाही, 3 खेळाडूंवर फुटणार सगळं खापर!

30 नोव्हेंबरला रांचीमध्ये भारत आणि दक्षिण आफ्रिका यांच्यात पहिली वनडे मॅच खेळवली जाणार आहे. वनडे सीरिजसाठीची टीम टेस्टपासून वेगळी आहे. टेस्टमध्ये खेळलेल्या 7 खेळाडूंना वनडे टीममध्ये संधी देण्यात आलेली नाही. तर विराट कोहली आणि रोहित शर्मा यांचं टीममध्ये कमबॅक झालं आहे.

दक्षिण आफ्रिकेविरुद्धच्या वनडे सीरिजसाठी भारताची बॉलिंग कमजोर वाटत आहे, त्यामुळे वनडे सीरिजमध्ये पराभव झाला तर कोच गौतम गंभीर नाही तर 3 खेळाडूंवर पराभवाचं खापर फुटलं जाण्याची शक्यता आहे.

दुखापतीमुळे कर्णधार शुभमन गिल वनडे सीरिज खेळणार नाही, त्याच्याऐवजी केएल राहुलला टीम इंडियाचं नेतृत्व देण्यात आलं आहे. राहुलला कॅप्टन्सीसोबतच बॅटिंग आणि विकेट कीपिंगमध्येही योगदान द्यावं लागणार आहे, त्यामुळे यातल्या एका जबाबदारीमध्येही राहुल अपयशी ठरला तर त्याच्यावर सगळं खापर फुटेल.

दक्षिण आफ्रिकेविरुद्धच्या टेस्ट सीरिजवेळीही राहुलवर टीका केली गेली. 60 मॅच खेळल्यानंतर टेस्टमध्ये राहुलची बॅटिंगची सरासरी 35 ची आहे. एवढ्या संधी मिळूनही राहुलच्या या कामगिरीवर निशाणा साधण्यात येत आहे.

दक्षिण आफ्रिकेविरुद्धच्या टेस्ट सीरिजमध्ये पराभव झाल्यानंतर खेळाडू कमी अनुभवी असल्याची प्रतिक्रिया गंभीरने दिली होती, त्यामुळे वनडे सीरिजमध्ये पराभव झाला तर रोहित आणि विराट निशाण्यावर येतील.

ऑस्ट्रेलियाविरुद्धच्या 3 वनडे मॅचच्या सीरिजमध्ये विराट पहिल्या दोन्ही सामन्यांमध्ये शून्य रनवर आऊट झाला, त्यानंतर तिसऱ्या सामन्यात त्याने अर्धशतक केलं. तर रोहित शर्माने एका सामन्यात शतक आणि एका सामन्यात अर्धशतकी खेळी केली. ही सीरिज भारताने 2-1 ने गमावली होती.