कपिल देव यांनी सांगितल्या टीम इंडियाच्या तीन घोडचूका, ज्यामुळे घरच्या मैदानावर भारताने टाकल्या नांग्या! पाहा कोणत्या?

साऊथ अफ्रिकाविरुद्धच्या कसोटी मालिकेत टीम इंडियाला पराभवाचं तोंड पहावं लागलं. त्यामुळे आता टीम इंडियाच्या कामगिरीवर चौफेर टीका होताना दिसत आहे. अशातच कपिल देव यांनी मोलाचा सल्ला दिला आहे.

प्रथम खेळाडूंना देशांतर्गत क्रिकेट खेळण्यास प्रोत्साहित करणं, दुसरं म्हणजे कसोटी सामन्यांसाठी चांगल्या खेळपट्ट्या तयार करणं आणि तिसरं म्हणजे पांढऱ्या बॉल क्रिकेट सामन्यांची वाढती संख्या थांबवणं, असे तीन सल्ले कपिल देव यांनी दिलेत.

आजचे किती अव्वल खेळाडू घरगुती क्रिकेट खेळत आहेत. ही सर्वात महत्त्वाची गोष्ट आहे. जर तुम्ही घरगुती क्रिकेट खेळला नाही आणि चांगल्या गोलंदाजांना तोंड दिले नाही तर तुम्हाला संघर्ष करावा लागेल, असं कपिल देव म्हणाले.

आजच्या युगात, जेव्हा बहुतेक लक्ष पांढऱ्या बॉल क्रिकेटवर असते, तेव्हा फलंदाजांना गोलंदाजांसाठी सोप्या खेळपट्ट्या मिळत नाहीत आणि त्यामुळे ते कठीण परिस्थितीचा सामना करू शकत नाहीत. खेळपट्ट्या खूप महत्त्वाच्या असतात. त्या अशा नसाव्यात जिथे अडीच दिवसांत खेळ संपतो, असंही देव म्हणाले.

आपण टी-२० आणि एकदिवसीय सामन्यांमध्ये जास्त व्यस्त असतो, याचा अर्थ फलंदाजांना गोलंदाजांना अनुकूल खेळपट्ट्यांचा सामना क्वचितच करावा लागतो. त्यामुळे पांढऱ्या बॉल क्रिकेट सामन्यांची वाढती संख्या कमी करणं गरजेचं आहे, असंही कपिल देव म्हणाले.