WPL : गुजरातच्या 'फिल्डिंग सेन्सेशन'ने एका बॉलमध्ये फिरवली मॅच, पाहून जॉन्टी ऱ्होड्स-सूर्याची आठवण येईल!

डब्ल्यूपीएलच्या चौथ्या सामन्यामध्ये गुजरात जाएंट्सने दिल्लीचा 4 रननी पराभव केला आहे. गुजरातने दिलेल्या 210 रनच्या आव्हानाचा पाठलाग करताना दिल्ली जिंकेल असं वाटत होतं, पण गुजरातच्या फिल्डरने केलेल्या कामगिरीने ही मॅच फिरली.

शेवटच्या 2 ओव्हरमध्ये दिल्लीला विजयासाठी 29 रनची गरज होती, तेव्हा गुजरातने काश्वी गौतमच्या हातात बॉल दिला. 19 व्या ओव्हरचा पहिलाच बॉल काश्वीने नो बॉल टाकला, ज्यावर जेमिमा रॉड्रिग्जने मोठा फटका मारला.

जेमिमाने मारलेला हा शॉट बाऊंड्री लाईनबाहेर जाईल, असं वाटत होतं, पण अनुष्का शर्माने बाऊंड्री लाईनवर विश्वास बसणार नाही अशी फिल्डिंग करून सिक्सच्या दिशेने जाणारा बॉल पुन्हा मैदानात फेकला.

अनुष्का शर्माच्या या कामगिरीमुळे गुजरातच्या 4 रन वाचल्या, ज्याचा फायदा त्यांना नंतर झाला. काश्वीने टाकलेल्या 19 व्या ओव्हरमध्ये तब्बल 22 रन आल्या, त्यामुळे दिल्लीला शेवटच्या ओव्हरमध्ये विजयासाठी 7 रनची गरज होती.

गुजरातने शेवटची ओव्हर सोफी डिव्हाईनला दिली, ज्यात तिने फक्त 2 रन देऊन 2 विकेटही घेतल्या, त्यामुळे गुजरातने हा सामना 4 रननी जिंकला. अनुष्का शर्माने फिल्डिंगमध्येही 4 रनच वाचवल्या होत्या, त्यामुळे या फिल्डिंगमुळे गुजरातने हा सामना जिंकला.