धक्कादायक! धावत्या बसची मागील दोन्ही चाकं निखळली, 25 प्रवाशांचा जीव टांगणीला; खिळखिळ्या बसवरुन तीव्र संताप

राज्य परिवहन महामंडळाच्या (एसटी) गलथान कारभाराचा आणखी एक धक्कादायक प्रकार उघडकीस आला आहे. पालघरहून मनोरकडे जाणाऱ्या एसटी बसला अचानक मागील भागातील दोन्ही टायर निखळल्याने मोठी दुर्घटना घडली.

टायर निखळल्यानंतरही बस तब्बल ३० ते ४० मीटरपर्यंत घसरत गेली, अशी माहिती प्रत्यक्षदर्शींनी दिली. सुदैवाने चालकाने प्रसंगावधान राखत बसचा ताबा न सोडता ती थांबवली आणि सर्व प्रवासी थोडक्यात बचावले.

घटनेच्या वेळी बसमध्ये किमान २० ते २५ प्रवासी होते. अचानक जोराचा आवाज झाल्यानंतर बस हलू लागली. मागून धूळ उडू लागल्याने प्रवासी घाबरले.

काहीजणांनी बसच्या पुढे धाव घेत मदतीसाठी ओरडायला सुरुवात केली. मात्र चालकाने शांतपणे बस सुरक्षित स्थळी थांबवत मोठा अनर्थ टाळला.

दरम्यान, या घटनेनंतर राज्य परिवहन महामंडळाचा निकृष्ट आणि बेफिकीर कारभार पुन्हा एकदा चव्हाट्यावर आला आहे. नियमित देखभाल नसल्याने अशा घटना वाढत असल्याची टीका प्रवाशांकडून होत आहे.

दुरुस्तीची कामे टाळाटाळीत आणि दुर्लक्षामुळे होत असल्याचा आरोपही काही कर्मचाऱ्यांनी केला. अपघाताचा तपास सुरू असून टायर निखळण्यामागील कारणांचा शोध एसटी प्रशासन घेत आहे.

दरम्यान, प्रवाशांच्या जीवाशी चाललेला हा खेळ तातडीने थांबवावा, देखभाल यंत्रणा सुधारावी, अशी मागणी स्थानिक नागरिक आणि प्रवासी संघटनांनी केली आहे